ރާއްޖޭގައި އޮފްޝޯ ބަންކަރިންގެ ޚިދުމަތް ރަސްމީކޮށް ފަށައިފި

ރާއްޖޭގެ އިހަވަންދިއްޕޮޅުގައި އޮފްޝޯ ބަންކަރިންގެ ޚިދުމަތް ރަސްމީކޮށް މިއަދު ފަށައިފިއެވެ.

މި ޚިދުމަތް ފައްޓަވައިދެއްވީ ހއ. ހޯރަފުށީގައި ބޭއްވުނު ރަސްމިއްޔާތެއްގައި ތިލަދުންމަތީ އުތުރުބުރީއަށް ނިސްބަތްވާ ރައްޔިތުންގެ މަޖިލީހުގެ މެންބަރުންނެވެ.

މި ރަސްމިއްޔާތުގައި އިކޮނޮމިކް މިނިސްޓަރު މުޙައްމަދު ސަޢީދާއި ސަރުކާރުގެ އެހެން އިސްވެރިންގެ އިތުރުން އެސްޓީއޯގެ މެނޭޖިންގ ޑިރެކްޓަރު ޝިމާދު އިބްރާހީމް އަދި ކުންފުނީގެ ބޯޑު މެންބަރުން ބައިވެރިވެވަޑައި ގެންނެވިއެވެ.

މި ޚިދުމަތުގެ ދަށުން އޮފްޝޯ ބަންކަރިން ނުވަތަ ބޯޓުތަކަށް ތެޔޮ ފޯރުކޮށްދިނުމުގެ ޚިދުމަތް ދޭނީ އެސްޓީއޯއިންނެވެ. އަދި ޕައިލަޓޭޖާއި މެރިޓައިމްގެ އެހެން ޚިދުމަތްތައް ދޭނީ އެމްޕީއެލްއިންނެވެ.

އިހަވަންދިއްޕޮޅުގައި ފްލޯޓިންގ ބަންކަރިންގެ ޚިދުމަތް ފަށާފައިވަނީ 3،258 ޓަނުގެ އެމްޓީ މެރިން އޭންޖަލް އާއި 3،929 ޓަނުގެ އެމްޓީ މެރިން ބެލާ ބޭނުންކޮށްގެންނެވެ. މި ދެ ބޯޓަކީ ބައިނަލްއަޤްވާމީ މިންގަނޑުތަކަށް ފެތޭ، ސަލާމަތާއި ރައްކާތެރިކަމުގެ ސެޓްފިކެޓްތައް ލިބިފައިވާ ދެ ބޯޓެވެ.

އެސްޓީއޯއިން ބުނާ ގޮތުގައި މި ޚިދުމަތުން ރާއްޖެއަށް ރަނގަޅު އާމްދަނީއެއް ލިބި، މިއީ ދެމެހެއްޓެނިވި އަދި ފައިދާ ބޮޑު ސިނާޢަތަކަށް ވެގެންދާނެއެވެ. މުސްތަޤުބަލުގައި މި ޚިދުމަތް އިތުރަށް ފުޅާކުރުމަށް ރޭވިފައިވާކަން ވެސް ފާހަގަކޮށްފައިވެއެވެ.