އީވާން ނަސީމްގެ މަރުގެ ހާދިސާއިން އިބުރަތް ހާސިލުކުރަން ޖެހޭ: ފައްޔާޒު

މާފުށީ ޖަލުގައި 2003 ވަނަ އަހަރުގެ ސެޕްޓެމްބަރު 19 ވަނަ ދުވަހު އަނިޔާކޮށް މަރާލި އީވާން ނަސީމްގެ މަރާ ގުޅިގެން ހިނގި ހާދިސާތަކަކީ މިއަދުގެ ޒުވާނުން ދިރާސާކޮށް އިބުރަތް ހާސިލުކުރަންޖެހޭ ކަމެއް ކަމަށް އެމްޑީޕީގެ ޗެއަރޕާސަން ފައްޔާޒު އިސްމާއީލް ވިދާޅުވެއްޖެއެވެ.

އީވާން ނަސީމް މަރާލި ދުވަހުގެ 21 ވަނަ އަހަރީ ދުވަހާ ގުޅިގެން "އެކްސް" ގައި ކުރެއްވި ޕޯސްޓެއްގައި ފައްޔާޒު ވިދާޅުވީ އެއީ ހުދުމުހުތާރު ވެރިކަމެއް ނިންމަން ދިވެހިން ހިތްވަރު ހޯދި ދުވަހެއް ކަމަށެވެ.

އީވާން މަރާލުމާ ގުޅިގެން ޖަލުގައި ތިބި ގައިދީންން ހަޅުތާލުކުރުމުން، އެ މީހުންގެ ތެރެއަށް ބަޑިޖަހައި ތިން ގައިދީއަކު މަރާލައި، 17 ގައިދީއަކަށް އަނިޔާވިއެވެ. މި ހާދިސާއާ ގުޅިގެން ގިނަ ރައްޔިތުންތަކެއް މަގުމައްޗަށް ނުކުމެ، އޭރުގެ ރައީސް މައުމޫން އަބްދުލްޤައްޔޫމްގެ އިސްތިއުފާއަށް ގޮވާލިއެވެ. ފައްޔާޒު ވިދާޅުވީ މި ހާދިސާތަކަކީ މިއަދު ލިބިފައިވާ މިނިވަންކަމާއި އަސާސީ ހައްޤުތަކުގެ އަސްލު ކަމަށެވެ. އަދި މިއީ ރާއްޖޭގެ އިސްލާހީ ހަރަކާތަށް ލިބުނު އާ ބާރެއް ކަމަށާއި، ޖަލުތަކަކީ ބައިނަލްއަޤްވާމީ މިންގަނޑުތަކާ އެއްގޮތަށް ހިންގާ ތަންތަނަށް ހެދުމަށް މަގުފަހިވި ކަމެއް ކަމަށެވެ.

މި ހާދިސާއިން 21 އަހަރު ފާއިތުވެގެން ދިޔަ ނަމަވެސް، އީވާން ނަސީމްގެ މަރުގެ ހަނދާން އަދިވެސް ދިވެހި ރައްޔިތުންގެ ހިތްތަކުގައި ދިރިއެބަހުއްޓެވެ. މި ހާދިސާއަކީ ރާއްޖޭގެ ޑިމޮކްރަސީއަށް މަގުފަހިކުރި އެންމެ މުހިންމު އެއް ހާދިސާ ކަމަށް ބެލެވެއެވެ. އޭގެ ފަހުން ރާއްޖޭގައި ހިނގި އިސްލާހީ ހަރަކާތްތަކާއި ސިޔާސީ ބަދަލުތަކުގެ ނަތީޖާއެއްގެ ގޮތުން، 2008 ވަނަ އަހަރު ރާއްޖޭގައި ފުރަތަމަ ޑިމޮކްރެޓިކް އިންތިޚާބު ބޭއްވި، އަދި ގިނަ ސިޔާސީ އަދި އިޖްތިމާއީ ބަދަލުތަކެއް ގެނެނެވުނެވެ.