ރައީސް މުއިއްޒު އދ. ގެ ސަލާމަތީ މަޖިލީހުގައި ތަޤްރީރުކުރައްވަނީ

ރައީސް ޑރ. މުހައްމަދު މުއިއްޒު މި މަހު އެމެރިކާގެ ނިއުޔޯކަށް ވަޑައިގަންނަވާ ދަތުރުފުޅުގައި އދ. ގެ ސަލާމަތީ މަޖިލީހުގެ ބަހުސެއްގައި ތަޤްރީރުކުރައްވާ ގޮތަށް ހަމަޖެހިއްޖެއެވެ.

މިއީ ރާއްޖޭގެ ރައީސަކު އެ މަޖިލީހުގައި ވާހަކަފުޅު ދައްކަވާ ފުރަތަމަ ފަހަރެވެ.

ރައީސް އޮފީހުގެ ތަރުޖަމާން ހީނާ ވަލީދު ވިދާޅުވި ގޮތުގައި ރައީސް މުއިއްޒު އދ. ގެ އާންމު މަޖިލީހުގެ 79 ވަނަ ސެޝަންގައި ވެސް ތަޤްރީރުކުރައްވާނެއެވެ. މީގެ އިތުރުން، އދ. އާންމު މަޖިލީހުގެ ހަވާސާގައި ރާއްޖެއިން ބާއްވާ ހާއްސަ ހަފްލާއެއްގައި ވެސް ބައިވެރިވެވަޑައިގަންނަވާނެއެވެ.

ރައީސްގެ މި ދަތުރުފުޅުގައި އެމެރިކާގެ ޕްރިންސްޓަން ޔުނިވަރސިޓީގެ ދަރިވަރުންނާ މުޚާޠަބުކުރައްވާ ތަޤްރީރެއް ވެސް ކުރައްވާނެ ކަމަށް ހީނާ ވިދާޅުވިއެވެ. ނަމަވެސް ރައީސް ފުރާވަޑައިގަންނަވާނެ ދުވަހެއް އަދި ހާމައެއް ނުކުރެއެވެ.

ރައީސް މުއިއްޒުގެ މި ދަތުރުފުޅަކީ އެމަނިކުފާނު ވެރިކަމާ ހަވާލުވެވަޑައިގެންނެވި ފަހުން އދ. އަށް ކުރައްވާ ފުރަތަމަ ދަތުރުފުޅެވެ. މި ދަތުރުފުޅުގައި ބައިނަލްއަޤްވާމީ މައިދާނުގައި ރާއްޖޭގެ އަޑު އުފުއްލެވުމަށާއި، ދުނިޔޭގެ އެހެން ޤައުމުތަކުގެ ވެރިންނާ ބައްދަލުކުރެއްވުމަށް ފުރުޞަތު ލިބިވަޑައިގަންނަވާނެ ކަމަށް ބެލެވެއެވެ.

އދ. ގެ ސަލާމަތީ މަޖިލީހަކީ ދުނިޔޭގެ އެންމެ ނުފޫޒު ގަދަ ފަސް ޤައުމު ދާއިމީ މެންބަރުންގެ ގޮތުގައި ހިމެނޭ މަޖިލީހެކެވެ. ރާއްޖެ ފަދަ ކުދި ޤައުމުތަކަށް މި މަޖިލީހުގައި ވާހަކަދެއްކުމުގެ ފުރުޞަތު ލިބުމަކީ ވަރަށް މުހިންމު ކަމެކެވެ.