އުތުރު ގޭޓްވޭ ޕްރޮޖެކްޓްގެ މައި އޮފީސް ހއ. އުލިގަމުގައި ހުޅުވައިފި

ރާއްޖޭގެ އެންމެ އުތުރުގެ ރަށްތައް ހިމެނޭ އިހަވަންދިއްޕޮޅުގައި ހިންގާ އުތުރު ގޭޓްވޭ ޕްރޮޖެކްޓްގެ މައި އޮފީސް ހއ. އުލިގަމުގައި ރޭ ހުޅުވައިފިއެވެ.

މި ރަސްމިއްޔާތުގައި އުތުރު އައި.އެސް.ޕީ.އެސް ގޭޓް ހުޅުވައި ދެއްވީ އެ ރަށުގެ ރިޓަޔާޑް މެޖިސްޓްރޭޓް އިދްރީސް އާދަމެވެ.

މި އޮފީހުގައި އެމްޕީއެލް، އިމިގްރޭޝަން، ކަސްޓަމްސް އަދި އެމްއެންޑީއެފްގެ މުވައްޒަފުންނަށް ޚާއްޞަ ޖާގަ ކަނޑައަޅާފައިވެއެވެ. އަދި ސެކިއުރިޓީ ސްކްރީން މެޝިނާއި ޑިޓެންޝަން ރޫމެއްވެސް ވަނީ ޤާއިމްކޮށްފައެވެ.

އެމްޕީއެލްގެ ސީއީއޯ މުޙައްމަދު ވަޖީހު އިބްރާހިމް ވިދާޅުވީ މި އޮފީސް މެދުވެރިކޮށް 14 ޚިދުމަތެއް ފޯރުކޮށްދެވޭނެ ކަމަށެވެ. މީގެ ތެރޭގައި ބަންކަރިންގ، ފެނާއި ކާބޯތަކެތި ފޯރުކޮށްދިނުން، ކްރޫ ބަދަލުކުރުން، ޑޮކިންގ، ކުނި އުކާލުން، ޓަގް ސަރވިސް އަދި މެއިންޓަނަންސްގެ ޚިދުމަތްތައް ހިމެނެއެވެ.

އެސްޓީއޯގެ ސީއީއޯ އަޙްމަދު ޝިމާދު ވިދާޅުވީ މި ޚިދުމަތްތަކާއެކު ރާއްޖޭގެ އުތުރު ސަރަޙައްދު ބޮޑު މާކެޓް ޕްލޭސްއަކަށް ބަދަލުވެގެންދާނެ ކަމަށެވެ. މި ސަރަޙައްދަކީ ދުވާލަކު 200 އަށްވުރެ ގިނަ އުޅަނދު ދަތުރުކުރާ ސްޓްރެޓެޖިކް ލޮކޭޝަނެއް ކަމަށް އޭނާ ފާހަގަކުރެއްވިއެވެ.

އުތުރު އައިއެސްޕީއެސް ގޭޓް އިމާރާތް ރޭ ހުޅުވުނު ނަމަވެސް، ބަންކަރިންގ ޚިދުމަތް ރަސްމީކޮށް ފެށުމަށް ހަމަޖެހިފައިވަނީ މިއަދުއެވެ. މި މަޝްރޫޢުގެ ދަށުން އިންޓަނޭޝަނަލް ބަންކަރިންގ ފެސިލިޓީއެއް ޤާއިމްކުރުމަށް އެސްޓީއޯއިން ނެދަލޭންޑްސްގެ "ވިޓޯލް" ކުންފުންޏާއެކު އެއްބަސްވުމުގައި ސޮއިކޮށްފައިވަނީ މިދިޔަ މާރިޗު މަހުއެވެ.