މާދަމާގެ ހެނދުނާ ހަމައަށް މޫސުން ގޯސްވާނެކަމަށް މެޓް އޮފީހުން ބުނެފި

މާދަމާގެ ހެނދުނު 6:00 އާ ހަމައަށް ރާއްޖޭގެ ބޮޑު ސަރަހައްދަކަށް މޫސުން ގޯސްވާނެ ކަމަށް މޯލްޑިވްސް މީޓިއޮރޮލޮޖިކަލް ސަރވިސް (މެޓް އޮފީސް) އިން މިއަދު ބުނެފިއެވެ.

މެޓް އޮފީހުން ދިން މަޢުލޫމާތުގައިވާ ގޮތުން، މިރޭ ރާއްޖޭގެ އެކި ހިސާބުތަކަށް ވާރޭވެހި، ގުގުރާނެ ކަމަށް ލަފާކުރެވޭތީ މޫސުމަށް ސަމާލުވުމަށް އާންމުންނަށް އިލްތިމާސްކޮށްފައިވެއެވެ. ޚާއްޞަކޮށް މެދުރާއްޖެތެރެ އާއި ދެކުނުގެ ރަށްތަކަށް ބޯކޮށް ވާރޭ ވެހޭނެ ކަމަށް ލަފާކުރެވޭ ކަމަށްވެސް އެ އޮފީހުން ބުނެފައިވެއެވެ.

މެޓް އޮފީހުން ބުނިގޮތުގައި އުތުރާއި މެދުރާއްޖެތެރޭގެ އަތޮޅުތަކަށް ވައި ޖެހޭނީ ހުޅަނގާއި ހުޅަނގު އުތުރުން އަދި ދެކުނުގެ އަތޮޅުތަކަށް ވައި ޖެހޭނީ ހުޅަނގުދެކުނާއި ހުޅަނގުން ގަޑިއަކު 8 މޭލާއި 18 މޭލާ ދެމެދދެމެދުގެ ބާރުމިނުގައި ކަމަށެވެ. އަދި ވިލާގަނޑުގައި ގާތްގަނޑަކަށް 40 މޭލަށް ވައި ގަދަވާނެ ކަމަށްވެސް އެ އޮފީހުން ލަފާކޮށްފައިވެއެވެ.

ކަނޑުގެ ޙާލަތާ ގުޅޭގޮތުން މެޓް އޮފީހުން ބުނެފައިވަނީ، ކަނޑުތައް އަދައިގެ ވަރަކަށް ގަދަވެފައި، ވިލާގަނޑުގައި ގަދަވުން އެކަށީގެންވާ ކަމަށެވެ. ރާޅުގެ އުސްމިން ހުންނާނީ ތިން ފޫޓާއި ހަ ފޫޓާ ދެމެދުގައި ކަމަށްވެސް އެ އޮފީހުން ބުނެފައިވެއެވެ.

މިވަގުތު ރާއްޖެއަށް ކުރަމުންދަނީ ހުޅަނގު މޫސުމުގެ ވިއްސާރައެވެ. ސެޓްލައިޓް ފޮޓޯތަކުން ދައްކާ ގޮތުގައި، މި ވަގުތު މެދުރާއްޖެތެރެ އާއި ދެކުނުގެ އަތޮޅުތަކުގެ މަތީގައި ގިނަ އަދަދަކަށް ވާރޭ ވިލާ ވަނީ އުފެދިފައެވެ. މީގެ އިތުރުން، މި މަހުގެ ބާކީ އޮތް ދުވަސްތަކުގައި ރާއްޖޭގެ ބޮޑު ބަޔަކަށް ކެރީގެ އަސަރު ކުރާނެ ކަމަށް ލަފާކުރެވޭ ކަމަށްވެސް މެޓް އޮފީހުން ބުނެފައިވެއެވެ.

މޫސުން ގޯސްވެފައިވާތީ، ކަނޑުދަތުރުފަތުރު ކުރާ ފަރާތްތަކުން ސަމާލުކަން ބެހެއްޓުމަށާއި، އާންމު ރައްޔިތުން މޫސުމަށް ސަމާލުވެ ތިބުމަށް މެޓް އޮފީހުން އިލްތިމާސް ކޮށްފައިވެއެވެ.