ބަޔާން މިއުނިކް ޗެމްޕިއަންސް ލީގުގައި ރިކޯޑު ނަތީޖާއަކުން މޮޅުވެއްޖެ

ޔުއެފާ ޗެމްޕިއަންސް ލީގުގައި  ބަޔާން މިއުނިކް ރޭ ކުޅުނު މެޗުން ރިކޯޑު ނަތީޖާއަކުން މޮޅުވެއްޖެއެވެ.

ރޭގެ މެޗެއްގައި ބަޔާން މިއުނިކް ވަނީ ކްރޮއޭޝިއާގެ ޑީނަމޯ ޒެގްރެބް އަތުން 9-2 ގެ ތަފާތު ބޮޑު ނަތީޖާއަކުން މޮޅުވެ ރެކޯޑު ހަދާފައެވެ. ހަމަ މިއާއި އެކު މި މެޗުގައި ބަޔާންގެ ފޯވާޑް ހެރީ ކޭން ވެސް ވަނީ ހެޓްރިކެއް ހަދައި، ރިކޯޑެއް ގާއިމުކޮށްފައެވެ.

ރޭ ޖަރުމަނުވިލާތުގެ މިއުނިކްގައި ހުންނަ އެލިއާންޒް އެރީނާގައި ކުޅުނު މި މެޗުގައި ކޭން ޖެހި ލަނޑުތަކާއެކު، އޭނާ ވަނީ ޗެމްޕިއަންސް ލީގުގެ ތާރީޚުގައި މިހާތަނަށް އެންމެ ގިނަ ލަނޑު ޖެހި އިނގިރޭސި ކުޅުންތެރިޔާގެ ޝަރަފު ހޯދާފައެވެ. މިހާރު ކޭން ވަނީ މި މުބާރާތުގައި ޖުމުލަ 33 ލަނޑު ޖަހާފައެވެ.

މި މެޗަކީ ޗެމްޕިއަންސް ލީގުގެ ތާރީޚުގައި މިހާތަނަށް އެންމެ ގިނަ ލަނޑުޖެހި މެޗުކަމަށްވެސް ވަނީ ރެކޯޑުކުރެވިފައެވެ. ޖުމުލަ 11 ލަނޑު ޖެހުނު މި މެޗުގައި ބަޔާންގެ ފަރާތުން ކޭންގެ އިތުރުން ރަފައެލް ގުއެރޭރޯ، މައިކަލް އޮލީސޭ، ލެރޯއީ ސާނޭ އަދި ލެއޮން ގޮރެޓްޒްކާ ވަނީ ލަނޑު ޖަހާފައެވެ. ޑީނަމޯ ޒެގްރެބްގެ ފަރާތުން ބްރޫނޯ ޕެޓްކޮވިޗް އަދި ޓަކޫޔާ އޮގިވާރާ ވަނީ ލަނޑު ޖަހާފައެވެ.

އިނގިރޭސި ޤައުމީޓީމުގެ ކެޕްޓަންކަންވެސް ކުރަމުން އަންނަ ހެރީ ކޭންއަށް މިއީ މި ސީޒަނުގައި ހެދި ދެވަނަ ހެޓްރިކެވެ. އޭނާ ވަނީ ޖަރުމަން ލީގުގައި މިދިޔަ ހޮނިހިރު ދުވަހު ހޯލްސްޓެއިން ކިއެލްއާ ދެކޮޅަށްވެސް ހެޓްރިކެއް ހަދާފައެވެ.

ބަޔާން މިއުނިކް މި މުބާރާތުގައި ދެން ކުޅޭނީ އަންނަ މަހުގެ ތިންވަނަ ދުވަހު ރަށުން ބޭރުގައި އިނގިރޭސި ކުލަބު އެސްޓަން ވިލާއާ ދެކޮޅަށެވެ.