މާފަންނު ގަޑިބުރު ކައިރީގައި ހުރި ގެއެއްގައި މީހަކު ނިޔާވެފައި އޮއްވާ ފެނިއްޖެ

މާފަންނު ގަޑިބުރު ކައިރީގައި ހުރި ގެއެއްގައި މީހަކު ނިޔާވެފައި އޮއްވާ ފެނިއްޖެއެވެ.

ދިވެހި ފުލުހުން މަޢުލޫމާތު ދެއްވިގޮތުގައި ރޭ 11:33 ހާއިރު މާފަންނު ގަޑިބުރު ކައިރީގައި ހުރި ގެއެއްގެ ތިންވަނަ ފަންގިފިލާގައި 57 އަހަރުގެ ފިރިހެނަކު ނިޔާވެފައި އޮއްވާ ފެނުނު ހަބަރު ރިޕޯޓްކުރުމާއި ގުޅިގެން އެ އިދާރާއިން ވަނީ އެސަރަހައްދަށް އެޓޭންޑުވެފައެވެ. އަދި ނިޔާވި މީހާގެ ހަށިގަނޑު ވަނީ އެމްބިއުލާންސްގައި ހޮސްޕިޓަލަށް ގެންގޮސްފައެވެ.

މަޢުލޫމާތު ލިބިފައިވާ ގޮތުގައި ނިޔާވެފައި އޮތް މީހާ އޮތީ މ. ނަލަހިޔާ މަންޒިލް ގޭތެރޭގައެވެ. މިހާދިސާއާ ގުޅިގެން އިތުރު މަޢުލޫމާތު ހޯދުމަށް މިވަގުތު ތަޙުޤީޤު ކުރިއަށްދާ ކަމަށް ފުލުހުން ވަނީ ބުނެފައެވެ.

މިފަދަ ހާދިސާތައް އިތުރުވަމުން އަންނަކަން ފާހަގަކުރެވޭއިރު، މިފަހަކަށް އައިސް ކުއްލި މަރުތައް ރާއްޖޭގައި އިތުރުވެފައިވާކަން ވެސް ފާހަގަ ކުރެވެއެވެ.