މީޑިއާ ކައުންސިލުގެ މެމްބަރުކަމަށް ކުރިމަތިލުމުގެ ފުރުޞަތު ހުޅުވާލައިފި

މޯލްޑިވްސް މީޑިއާ ކައުންސިލް (އެމްއެމްސީ) ގެ 10 މެންބަރުންގެ ދައުރު ހަމަވާތީ، އެ މަޤާމުތަކަށް ކުރިމަތިލުމުގެ ފުރުޞަތު އިންފޮމޭޝަން މިނިސްޓްރީން ހުޅުވާލައިފިއެވެ.

މި ފުރުޞަތު ހުޅުވާލާފައިވަނީ މިހާރު ތިބި ބައެއް މެންބަރުންގެ ދައުރު މިއަހަރުގެ ޑިސެންބަރު 14 ވަނަ ދުވަހު ހަމަވާތީއެވެ.

އިއްޔެ ގެޒެޓު ކުރެވުނު އިޢުލާނުގައިވާ ގޮތުން، ހުސްވާ މަޤާމުޤާމުތަކަކީ މީޑިއާތަކުން ތަމްސީލުކުރާ ހަތް މެންބަރުންނާއި އާންމު ތިން މެންބަރުންގެ މަޤާމުތަކެވެ. އާންމު މެންބަރުންގެ ގޮތުގައި ތިބެނީ މީޑިއާތަކާއި އެއްވެސް ވަރަކަށް ގުޅުންހުރި ދާއިރާއެއްގައި މަސައްކަތް ނުކުރާ މީހުންނެވެ. މީޑިއާ ތަމްސީލުކުރާ މަޤާމުތަކަށް ކެންޑިޑޭޓުން ހުށަހަޅާނީ ރަޖިސްޓްރީ ކޮށްފައިވާ މީޑިއާތަކުންނެވެ.

މީޑިއާ ކައުންސިލަށް ކުރިމަތިލާ ފަރާތްތަކުގައި ފުރިހަމަވާންޖެހޭ ޝަރުޠުތަކުގެ ތެރޭގައި ދިވެހި ރައްޔިތެއް ކަމުގައިވުމާއި، އުމުރުން 18 އަހަރު ފުރިފައިވުން ހިމެނެއެވެ. މީގެ އިތުރުން، އިސްލާމް ދީނުގައި ހައްދެއް ކަނޑައެޅިފައިވާ ކުށެއް ކުރިކަން ޝަރީޢަތަށް ސާބިތުވެފައިވާ މީހެއް ކަމުގައި ނުވުމާއި، މަސްތުވާތަކެތީގެ ވިޔަފާރި ކުރުމުގެ ކުށް ސާބިތުވެފައިވާ މީހެއް ކަމުގައި ނުވުން ފަދަ ޝަރުޠުތައް ހިމެނެއެވެ.

މީޑިއާ ކައުންސިލުގެ މެންބަރުކަމަށް ކުރިމަތިލައްވަން ބޭނުންވާ ފަރާތްތަކުން މި ހިނގާ ސެޕްޓެންބަރު 25 ވަނަ ދުވަހުގެ ކުރިން އިންފޮމޭޝަން މިނިސްޓްރީގެ މެއިލަށް އެޕްލިކޭޝަން ފޮނުވުމަށް އިޢުލާނުގައި އަންގާފައިވެއެވެ.

މީޑިއާ ކައުންސިލުގެ ދައުރަކީ މީލާދީ ގޮތުން ދެ އަހަރު ދުވަހެވެ. އަދި ކައުންސިލްގެ މެންބަރުކަމުގައި ދެ ދައުރު ޖެހިޖެހިގެން އެއް މެންބަރަކަށް އަދައެއް ނުކުރެވޭނެއެވެ. މީޑިއާ ކައުންސިލްގެ މެންބަރުންގެ ޖުމްލަ އަދަދަކީ 13 އެވެ.