ޕީޖީގެ މަގާމަށް އައްބާސް އައްޔަން ކުރުމަށް މަޖިލީހުން ރުހުން ދީފި

ހުސްވެފައިވާ ޕްރޮސެކިއުޓާ ޖެނެރަލް (ޕީޖީ)ގެ މަގާމަށް އައްބާސް ޝަރީފް އައްޔަން ކުރަން، ރައްޔިތުންގެ މަޖިލީހުން ރުހުންދީފިއެވެ.

އައްބާސް އަށް ރުހުން ދިނުމަށް މަޖިލީހުން ފާސްކުރީ ދައުރުން ބޭރުން މިއަދު ބޭއްވި ހާއްސަ ޖަލްސާގައެވެ. އެ ޖަލްސާގައި އައްބާސް އަށް ރުހުން ދިނީ 85 މެންބަރުންގެ ވޯޓުންނެވެ. އައްބާސްއަށް ރުހުން ނުދޭން އެއްވެސް މެންބަރަކު ވޯޓު ދެއްވާފައެއް ނުވެއެވެ.

އައްބާސް މިވަގުތު އަދާކުރައްވަނީ ރައީސް އޮފީހުގެ ލީގަލް ސެކެޓްރީގެ މަގާމުކަމެވެ.

ޔުނިވާސިޓީ އޮފް ޓެސްމޭނިއާ އިން ގާނޫނީ ދާއިރާގެ މަތީ ތައުލީމް ހާސިލް ކުރައްވާފައިވާ އަައްބާސް އަކީ ގާނޫނީ ދާއިރާގެ ތަޖުރިބާ ވެސް ހުންނެވި ބޭފުޅެކެވެ. 2011 އިން 2015 ގެ ނިޔަލަށް ހައި ކޯޓުގެ ފަނޑިޔާރުކަން ވެސް އައްބާސް ކުރެއްވިއެވެ.

ޕީޖީގެ މަގާމު ހުސްވީ، އެ މަގާމުގައި ހުންނެވި ހުސައިން ޝަމީމް، ޕީޖީގެ މަގާމުން ވިކިކުރުމަށް މަޖިލީހުން ފާސްކުރުމުންނެވެ. އެގޮތުން އޭނާ ވަކިކުރަން މަޖިލީހުން ފާސްކުރިއިރު، އެ މަގާމުން ޝަމީމް އަމިއްލަފުލަށް އިސްތިއުފާ ދެއްވިއެވެ. އެހެން ނަމަވެސް އެ ސިޓީ މަޖިލީހުގެ އިދާރާއަށް ނުލިބޭ ކަމުގައި ބުނެ، ޝަމީމް ވަކިކުރުމުގެ މަސައްކަތް މަޖިލީހުން ކުރިއެވެ. އެގޮތުން ޝަމީމް ވަކިކުރީ 65 މެންބަރުންގެ ވޯޓުންނެވެ.

ޝަމީމް ވަކިކުރީ، ސަރުކާރު ހިންގާ ޕީއެންސީއަށް ނިސްބަތްވާ ހުޅުދޫ ދާއިރާގެ މެންބަރު މުހައްމަދު ޝާހިދު ހުށަހެޅުއްވި މައްސަލައަކާ ގުޅިގެންނެވެ. އެގޮތުން އެ މައްސަލައިގައި ވަނީ އޭނާ މަގާމުން ވަކިކުރަން ޖެހޭ އަށް ސަބަބެއް ބަޔާންކޮށްފައެވެ.