އެންތަނީއަށް ވަކި ހާއްސަ ގޮތެއް ނޯންނާނެ: ޓެން ހާގް

އެންތަނީ އާއި ޓެންހާގް

މެންޗެސްޓާ ޔުނައިޓެޑްގެ ބްރެޒިލް ވިންގަރ އެންތަނީއަށް މެޗުތަކުގައި ފުރުސަތު ދިނުމުގައި ވަކި ހާއްސަ ގޮތެއް ނޯންނާނެ ކަމަށް ޓީމުގެ ކޯޗު އެރިކް ޓެން ހާގް ބުނެފިއެވެ.

ޔުނައިޓެޑުން 100 މިލިއަން ޑޮލަރަށް ގަތް އެންތަނީއަށް ޔުނައިޓެޑުގެ ގަދަ 11 ގައި ހިމެނި އެކަށޭނަ ކުޅުމެއް ނުދެއްކެއެވެ. މިދިޔަ ސީޒަނުގައި ލީގުގައި އޭނާ ޖެހީ އެންމެ ގޯލެކެވެ. މި ސީޒަނުގައި މިހާތަނަށް ކުޅެފައިވަނީ އެންމެ މިނިޓެކެވެ.

ލީގު ކަޕްގެ މެޗެއްގެ ކުރިން ޓެން ހާގް ބުނީ އެންތަނީ ފަދަ ކުޅުންތެރިންނަށް ޓީމުން ފުރުސަތު ލިބެން އޮތީ ބުރަކޮށް ޓްރެއިނިންގައި މަސައްކަތްކޮށްގެން ކަމަށެވެ. އަދި ޓީމުގައި ހިމެނުން އޭނާއަށް ހައްގުވާކަން ސާބިތުކޮށްދޭން ޖެހޭނެ ކަމަށެވެ.

އެންތަނީގެ ކޮންޓްރެކްޓް 2027 ވަނަ އަހަރުގެ ޖޫން މަހުގެ ނިޔަލަށް އޮތްއިރު، ތުރުކީގެ ބައެއް ކްލަބްތަކުން ލޯނަށް ގެންދަން ހުށަހެޅި ޕްރޮޕޯސަލަށް އޭނާ ވަނީ ފުރަގަސްދީފައެވެ.

ޓެން ހާގް އިތުރަށް ބުނީ، ޓީމުގެ ކޮންމެ ކުޅުންތެރިއަކަށްވެސް ފުރުސަތު ލިބޭނީ އެމީހެއްގެ ޕަފޯމަންސްއަށް ބަލައިގެން ކަމަށެވެ. "އަޅުގަނޑުމެން ބަލަނީ ކޮންމެ ދުވަހަކުވެސް ކުޅުންތެރިން ކުޅޭ ގޮތަށް. އެންމެ ރަނގަޅަށް ކުޅޭ ކުޅުންތެރިންނަށް ފުރުސަތު ލިބޭނެ. މިއީ ފުޓްބޯޅައިގެ އާންމު އުސޫލު،" ޓެން ހާގް ބުނެފައިވެއެވެ.

މެންޗެސްޓަރ ޔުނައިޓެޑް