ރާއްޖެއަށް ޒިޔާރަތްކުރި ފަތުރުވެރިންގެ އަދަދު 1.4 މިލިއަނަށްވުރެ މައްޗަށް

މި އަހަރުގެ ފުރަތަމަ 10 މަސް ތެރޭގައި ރާއްޖެއަށް ޒިޔާރަތްކުރި ފަތުރުވެރިންގެ އަދަދު 1.4 މިލިއަނަށް ވުރެ އިތުރުވެއްޖެއެވެ.

ޓޫރިޒަމް މިނިސްޓްރީން އިއްޔެ ހާމަކުރި ތަފާސް ހިސާބުތަކުން ދައްކާ ގޮތުގައި މި މަހުގެ 15 ވަނަ ދުވަހުގެ ނިޔަލަށް ރާއްޖެއަށް 1,421,769 ފަތުރުވެރިން ޒިޔާރަތްކޮށްފައިވެއެވެ. މި އަދަދަކީ ފާއިތުވި އަހަރުގެ މި މުއްދަތާ އަޅާބަލާއިރު 10.2 އިންސައްތައިގެ ކުރިއެރުމެކެވެ.

މިނިސްޓްރީގެ ތަފާސް ހިސާބުތަކުން އިތުރަށް ހާމަވާ ގޮތުގައި 2022 ވަނަ އަހަރުގެ މި މުއްދަތުގައި 1,133,654 ފަތުރުވެރިން ރާއްޖެއަށް ޒިޔާރަތްކޮށްފައިވާއިރު، 2023 2023 ވަނަ އަހަރުގެ މި މުއްދަތުގައި 1,290,332 ފަތުރުވެރިން ރާއްޖެއަށް ޒިޔާރަތްކޮށްފައިވެއެވެ. މި އަހަރުގެ މިހާތަނަށް ރާއްޖެއަށް އެންމެ ގިނަ ފަތުރުވެރިން ޒިޔާރަތްކޮށްފައިވަނީ ޗައިނާއިންނެވެ. އެ ޤައުމުން 207,749 ފަތުރުވެރިން ރާއްޖެއަށް ޒިޔާރަތްކޮށްފައިވާއިރު، މިއީ ޖުމުލަ ފަތުރުވެރިންގެ 14.6 އިންސައްތައެވެ.

ދެވަނައަށް އެންމެ ގިނަ ފަތުރުވެރިން ޒިޔާރަތްކޮށްފައިވަނީ ރަޝިޔާއިން ކަމަށްވާއިރު، އެ ޤައުމުން 154,178 ފަތުރުވެރިން ރާއްޖެއަށް ޒިޔާރަތްކޮށްފައިވެއެވެ. ތިންވަނައިގައިވާ އިނގިރޭސިވިލާތުން 121,903 ފަތުރުވެރިން ރާއްޖެއަށް ޒިޔާރަތްކޮށްފައިވެއެވެ. މިހާރު ރާއްޖޭގައި ފަތުރުވެރިކަމަށް 1,222 ތަނެއް ހިންގަމުން ގެންދެއެވެ. މީގެ ތެރޭގައި 174 ރިސޯޓާއި، 881 ގެސްޓްހައުސްގެ އިތުރުން 153 ސަފާރީ އުޅަނދާއި 14 ހޮޓާ ހިމެނެއެވެ. މި ތަންތަނުގައި ޖުމުލަ 62,778 އެނދު ފަތުރުވެރިކަމަށް އޮޕަރޭޓްކުރެވެމުންދެއެވެ.

މި ތަފާސް ހިސާބުތަކުން ދައްކާ ގޮތުގައި ރާއްޖޭގެ ފަތުރުވެރިކަން އަހަރުން އަހަރަށް ކުރިއަރަމުންދާކަން ފާހަގަކުރެވެއެވެ. ޚާއްޞަކޮށް ކޮވިޑް-19 ބަލިމަޑުކަމަށްފަހު ފަތުރުވެރިކަން އަވަސް ސްޕީޑެއްގައި އާރާސްތުވަމުން އަންނަކަން މި ހިސާބުތަކުން ހާމަވެއެވެ.