ސަރުކާރުން 16 ޖަމިއްޔާއަކަށް 3 މިލިއަން ރުފިޔާގެ ހިލޭ އެހީ ދޫކޮށްފި

ސަރުކާރުން 16 ޖަމިއްޔާއަކަށް 3 މިލިއަން ރުފިޔާގެ ހިލޭ އެހީ ދޫކޮށްފައިވާ ކަމަށް ސަރުކާރުން މިއަދު ބުނެފިއެވެ.

މި މަޢުލޫމާތު ހާމަކުރެއްވީ ރައީސް އޮފީހުގައި މިއަދު ބޭއްވުނު ނޫސްވެރިންގެ ބައްދަލުވުމެއްގައި އެ އޮފީހުގެ ތަރުޖަމާނު ހީނާ ވަލީދެވެ.

ހީނާ ވިދާޅުވީ ޔޫތު މިނިސްޓްރީން ގްރާންޓް ދޫކުރާނެ 16 ޖަމިއްޔާއެއް ކަނޑައަޅައި ޖުމުލަ 3 މިލިއަން ރުފިޔާ އެ ޖަމިއްޔާތަކަށް މިހާރު ދޫކޮށްފައިވާ ކަމަށެވެ. ނަމަވެސް ގްރާންޓް ދޫކުރި ޖަމިއްޔާތަކާއި ޖަމިއްޔާތައް ކަނޑައެޅުމުގައި މިނިސްޓްރީން ބެލި މިންގަނޑުގެ ތަފްސީލެއް ނުދެއެވެ.

"އޭގައި ވަރަށް ގިނަ ޓެކްނިކަލް ވާހަކަތަކެއް ވެސް ހިމެނޭތީ، އެންމެ ރަނގަޅު ވާނީ މިނިސްޓްރީން ސާފުކުރިއްޔާ، މިނިސްޓްރީން އެ ތަފްސީލްތައް މީޑިއާތަކަށް ދޭނެ،" ތަފްސީލުތަކާ ގުޅޭ ގޮތުން ނޫސްވެރިޔަކު ސުވާލު ކުރުމުން ހީނާ ވިދާޅުވިއެވެ.

ޔޫތު މިނިސްޓަރުކަމާ އިބްރާހީމް ވަހީދު (އަސްވާޑު) ހަވާލުވެވަޑައިގަތުމަށް ފަހު އެންމެ ފުރަތަމަ ބޭއްވި ނޫސްވެރިންގެ ބައްދަލުވުމުގައި އޭނާ ވަނީ ޖަމިއްޔާތަކުން ސަރުކާރުގެ އެހީތެރިކަމަށް އެދޭ ކަން ފާހަގަ ކުރައްވައިފައެވެ. އަދި އެ ކަމަށް މިނިސްޓްރީން އުސޫލުތަކެއް ހަމަޖައްސަވާނެ ކަމަށް މިނިސްޓަރު އޭރު ވިދާޅުވިއެވެ.

މީގެ އިތުރުން، ދީނީ ޚިދުމަތް ފޯރުކޮށްދޭ ޖަމިއްޔާތަކާ އެކީ އިސްލާމިކް މިނިސްޓްރީން އިއްޔެ ބޭއްވި މަހާސިންތާއެއްގައި މިނިސްޓަރު ޑރ. މުހައްމަދު ޝަހީމް އަލީ ސައީދު ވެސް ވަނީ އެ ޖަމިއްޔާތަކަށް މާލީ އެހީތެރިކަމާއި މިނިސްޓްރީން ވަސީލަތްތައް ފޯރުކޮށްދޭނެ އުސޫލެއް ހަމަޖައްސަވާނެ ކަމަށް ވިދާޅުވެފައެވެ.

އަދި ޔޫތު މިނިސްޓްރީން ކަނޑައަޅާ އުސޫލެއްގެ ތެރެއިން އާޓިސްޓުންނަށް ވެސް ކޮންމެ އަހަރަކު 25 މިލިއަން ރުފިޔާގެ ހިލޭ އެހީއެއް ދޫކުރައްވާނެ ކަމަށް ވެސް ރައީސް މުހައްމަދު މުއިއްޒު މިދިޔަ ޖުލައި މަހު ވަނީ ވިދާޅުވެފައެވެ.