ޗައިނާއާއެކު ވިޔަފާރި އިތުރުވެ، އަހަރަކު 1 ބިލިއަން ޑޮލަރަށް އަރާނެ: ސަރުކާރު

 

ރާއްޖެ އާއި ޗައިނާއާ ދެމެދު މިހާރު އަހަރަކު 700 މިލިއަން ޑޮލަރުގެ ވިޔަފާރި ކުރާ ކަމަށާއި ފްރީ ޓްރޭޑް އެގްރީމަންޓް (އެފްޓީއޭ) އަށް އަމަލު ކުރަން ފެށުމުން އެ ވިޔަފާރި ބޮޑު ތަނުން އިތުރުވެ، އަހަރަކު 1 ބިލިއަން ޑޮލަރަށް އަރާނެ ކަމަށް ސަރުކާރުން މިއަދު ބުނެފި އެވެ.

ރައީސް އޮފީހުގައި މިއަދު ބޭއްވުނު ނޫސްވެރިންގެ ބައްދަލުވުމުގައި ސަރުކާރުގެ ތަރުޖަމާނު ހީނާ ވަލީދު ވިދާޅުވި ގޮތުގައި ޗައިނާގެ އެފްޓީއޭއަށް މި މަހު އަމަލުކުރަން ފަށާނެ އެވެ. އަދި މި މަހު ގާއިމުކުރި ލޯކަލް ކަރަންސީ ސްވޮޕް އެގުރިމަންޓާ ގުޅޭ ގޮތުން ސަރުކާރުގެ ނަޒަރު ވެސް އޭނާ ހާމަކުރެއްވި އެވެ.

"ދިވެހިރާއްޖެ އާއި ޗައިނާއާ އެކީގައި މިހާރު އެފްޓީއޭގެ އެގްރިމަންޓުގައިވާ ގޮތުގެ މަތިންނާއި މި އެފްޓީއޭއަށް އަމަލުކުރަން ފެށުމާ ގުޅިގެން 1 ބިލިއަން ޑޮލަރަށް މި ވިޔަފާރި ފުޅާވެގެންދާނެ،" ހީނާ ވިދާޅުވި އެވެ.

ކަރަންޓު އެކައުންޓުގެ މުއާމަލާތްތަކާއި ސީދާ އިންވެސްޓްމަންޓްތައް ދިވެހި ރުފިޔާއިން ކުރެވޭ ގޮތަށް ސަރުކާރުން ޕީޕަލްސް ބޭންކް އޮފް ޗައިނާ (ޕީބީއޯސީ)އާ އެކު އެމްއޯޔޫއެއްގައި ސޮއިކޮށްފައިވާ ކަމަށާއި މިއިން ވެސް ފައިދާތަކެއް ވާނެ ކަމަށް ހީނާ ވިދާޅުވި އެވެ. މީގެ ސަބަބުން ޑޮލަރަށް ބަރޯސާވުން ކުޑަވެ، ދަތުރުފަތުރާއި މުދާ ގަތުމުގައި ލުއިފަސޭހަތަކެއް ލިބިގެންދާނެ ކަމަށް އޭނާ ފާހަގަކުރެއްވި އެވެ.

ޗައިނާއަކީ ރާއްޖޭގެ ދަރަނީގެ ބޮޑު ބައެއް ނިސްބަތްވާ ގައުމަކަށް ވާއިރު، ސަރުކާރުން ގެންދަނީ ޗައިނާއާއެކީ އިތުރަށް ގުޅުން ބަދަހި ކުރުމަށް މަސައްކަތް ކުރަމުންނެވެ. މިގޮތުން ލޯނު ދެއްކުން ފަސް އަހަރަށް ފަސްކުރުމުގެ ސިގުނަލެއް ޗައިނާއިން ދީފައިވާ ކަމަށް ރައީސް މުހައްމަދު މުއިއްޒު މިދިޔަ 26 ޖުލައިގައި ވިދާޅުވެފައިވެ އެވެ.

ޗައިނާއާ އެކީ އެފްޓީއޭއެއް ފުރަތަމަ ގާއިމުކުރީ، ކުރީގެ ރައީސް އަބްދުﷲ ޔާމީނުގެ ވެރިކަމުގައި ކަމަށް ވިޔަސް، ދެން އައި ސަރުކާރު، ކުރީގެ ރައީސް އިބްރާހީމް މުހައްމަދު ސޯލިހުގެ ސަރުކާރުން އެ އެފްޓީއޭ ތަންފީޒުކޮށްފައެއް ނުވެ އެވެ. ނަމަވެސް މިހާރުގެ ސަރުކާރުން މި މަހު އެފްޓީއޭ ތަންފީޒުކުރަން ފެށުމާއެކު، ދެ ގައުމުގެ ވިޔަފާރީގެ ގުޅުން އިތުރަށް ހަރުދަނާވެގެންދާނެ ކަމަށް ބެލެވެ އެވެ.