ކުންފުންޏާ ބެހޭ ގާނޫނަށް އިސްލާހު ގެނައުމުގެ ބިލު ކޮމެޓީން ފާސްކޮށްފި

ރައްޔިތުންގެ މަޖިލީހުން މިއަދު ދައުރުން ބޭރުގައި ބޭއްވި ޚާއްޞަ ޖަލްސާއެއްގައި ކުންފުންޏާ ބެހޭ ގާނޫނަށް ސަރުކާރުން ހުށަހެޅި އިސްލާހުތަކެއް ވަނީ ކޮމެޓީން ފާސްކޮށްފައެވެ.

މިއަދު ހެނދުނު 9:00 ގައި ފެށުނު ޖަލްސާގައި، އެ އިސްލާހުތަކާ މެދު ގާތްގަނޑަކަށް އެއް ގަޑިއިރު ވަންދެން ބަހުސްކުރުމަށްފަހު، މަޖިލީހުން ވަނީ އެ އިސްލާހުތައް ބަލައިގަނެ އިގްތިޞާދީ ކޮމިޓީއަށް ފޮނުވާފައެވެ. އޭގެ ފަހުން، މެންދުރުފަހު 11:30 ގައި ބޭއްވުނު އިގްތިޞާދީ ކޮމިޓީގެ ބައްދަލުވުމުގައި، އެއްވެސް ބަދަލެއް ނުގެނެސް އެ އިސްލާހުތައް ފާސްކޮށް، އަލުން މަޖިލީހުގެ ތަޅުމަށް ފޮނުވާފައިވެއެވެ.

މި އިސްލާހުތަކުގެ ތެރޭގައި ހިމެނެނީ:

1. ހިއްސާދާރުންގެ ޚާއްޞަ އާންމު ޖަލްސާއަކަށް ނޯޓިސް ފޮނުވުމުގެ މުއްދަތު 21 ދުވަހުން 3 ދުވަހަށް ކުރުކުރުން.

2. ޚާއްޞަ އާންމު ޖަލްސާއެއް ބޭއްވުމުގެ ނޯޓިސް މުއްދަތު 14 ދުވަހުން 7 ދުވަހަށް ކުރުކުރުން.

3. ކުންފުނިތަކުގެ މެނޭޖިންގ ޑިރެކްޓަރުންނާއި ޑިރެކްޓަރުންގެ މަޤާމު ހުސްވުމުން އައު މީހުން އައްޔަންކުރުމުގެ މުއްދަތު 30 ދުވަހުން 10 ދުވަހަށް ކުރުކުރުން.

މަޖިލީހުގެ ރައީސް އަބްދުއްރަހީމް އަބްދުﷲ ވިދާޅުވި ގޮތުގައި މާދަމާ ވެސް ދައުރުން ބޭރުގެ ޖަލްސާއެއް ބޭއްވޭނެއެވެ.

މާދަމާގެ ޖަލްސާގައި ޕްރޮސެކިއުޓަރ ޖެނެރަލްގެ މަޤާމަށް އައްބާސް ޝަރީފް އައްޔަންކުރުމަށް ރުހުން ދިނުމާއި، މިއަދު ފާސްކުރި ކުންފުންޏާ ބެހޭ ގާނޫނުގެ އިސްލާހުތަކަށް ވޯޓަށް އެހުން ހިމެނޭނެ ކަމަށް ބެލެވެއެވެ.