ބީއެމްއެލްގެ އިސް މަގާމުތަކަށް ދިވެހިން އައްޔަނުކުރުމަށް ނާޒިމް ގޮވާލައްވައިފި

ބޭންކް އޮފް މޯލްޑިވްސް (ބީއެމްއެލް) ގެ ޒިންމާދާރު މަގާމުތަކަށް ދިވެހިން އައްޔަނުކުރުމަށް ރައްޔިތުންގެ މަޖިލީހުގެ ނައިބު ރައީސް އަހުމަދު ނާޒިމް މިއަދު ގޮވާލައްވައިފިއެވެ.

ނާޒިމް މިފަދައިން ވިދާޅޫވެފައި ވަނީ މަޖިލީހުގެ މިއަދުގެ ޖަލްސާގައި ކުންފުނިތަކާ ބެހޭ ގާނޫނަށް އިސްލާހު ގެނައުމުގެ ބިލަށް ބަހުސްކުރައްވަމުންނެވެ.

ނާޒިމް ވިދާޅުވީ ބީއެމްއެލްގެ އިސް މަގާމުތަކުގައި ތިބި ބޭރުގެ މުވައްޒަފުންނަށް 15,000 ޑޮލަރުގެ މުސާރަ ދެމުންދާއިރު، މި މަގާމުތަކަށް ދިވެހިން ލެވޭތޯ ބަލަންޖެހޭ ކަމަށެވެ. އަދި ދިވެހިންގެ ބޭންކު، ދިވެހިންގެ ކޮންޓްރޯލު ނެތި ހިންގާނަމަ ކުރިއަށް އޮތްތަނުގައި ސީރިއަސް މައްސަލަތަކެއް ދިމާވެދާނެ ކަމަށް އޭނާ ވިދާޅުވިއެވެ.

މި ބިލުގެ ބަހުސްގައި ސަރުކާރު މެންބަރުން ވިދާޅުވަޅުވަނީ މިއީ މިވަގުތަށް މުހިއްމު ބަދަލެއް ކަމަށާއި، ކުންފުނިތަކުގެ ހިންގުން ހަރުދަނާވާނެ ބަދަލެއް ކަމަށެވެ.

މިދިޔަ އޮގަސްޓު މަހު ބީއެމްއެލްގެ ކާޑުތަކުން ޑޮލަރު މުއާމަލާތް ނުކުރެވޭ ގޮތަށް ނިންމުމާ ގުޅިގެން، ބޭންކާއި އިދިކޮޅު ފަރާތްތަކުން މާލީ ބަޣާވާތެއް ކުރަން އުޅުނު ކަމަށް ބުނާ މައްސަލައެއް ފުލުހުން ބަލަމުންދަނިކޮށް، ބޭންކުގެ ސީއީއޯ ވަނީ މި މަހުގެ 8 ވަނަ ދުވަހު އިސްތިއުފާ ދެއްވާފައެވެ.

މި އިސްލާހުގެ ސަބަބުން، ކުންފުނިތަކުގެ އާންމު ޖަލްސާތައް އަވަހަށް ބޭއްވުމަށް މަގުފަހިވެ، ބީއެމްއެލް ފަދަ މުހިއްމު މާލީ އިދާރާތަކުގެ ހިންގުން ހަރުދަނާކުރުމަށް އިތުރު ފުރުސަތު ލިބިގެންދާނެ ކަމަށް ބެލެވެއެވެ.