ނަމާދަށް އަހުލުވެރި ކުރުމުގެ ޕްރޮގްރާމްތަކަށް އިސްލާމިކް މިނިސްޓްރީން މާލީ އެހީ ދެނީ

ނަމާދަށް އަހުލުވެރި ކުރުމަށް ޖަމިއްޔާތަކުން ކުރިއަށް ގެންދާ ޕްރޮގްރާމްތަކަށް އިސްލާމިކް މިނިސްޓްރީން މާލީ އެހީ ފޯރުކޮށްދޭނެ ކަމަށް އިސްލާމިކް މިނިސްޓަރ ޑރ. މުޙައްމަދު ޝަހީމް ޢަލީ ސަޢީދު ވިދާޅުވެއްޖެއެވެ.

މިނިސްޓަރ މިފަދައިން ވިދާޅުވެފައި ވަނީ އިއްޔެ ހެނދުނު އިސްލާމީ މަރުކަޒުގައި ބޭއްވުނު ދީނީ ޖަމިއްޔާތަކުގެ އަހަރީ ބައްދަލުވުމުގައެވެ.

މިނިސްޓަރ ޝަހީމް ފާހަގަކުރެއްވި ގޮތުގައި، ރާއްޖެއަށް މިހާރު ކުރިމަތިވެފައިވާ ފިކުރީ އަދި އިޖުތިމާޢީ ގޮންޖެހުންތަކާ ކުރިމަތިލުމަށް ސަރުކާރާއި ދީނީ ޖަމިއްޔާތަކާއި ޢިލްމުވެރިން ގުޅިގެން މަސައްކަތްކުރުން މުހިންމެވެ. އަދި މިކަމަށް ސަރުކާރުން ޚާއްޞަ އަހައްމިއްޔަތުކަމެއް ދޭކަމަށްވެސް މިނިސްޓަރ ވިދާޅުވިއެވެ.

މި ބައްދަލުވުމުގައި ރާއްޖޭގެ 70 ޖަމްޢިއްޔާއަކުން 98 މަންދޫބުން ބައިވެރިވާއިރު، ދަޢުވަތުގެ މައިދާނުގައި ހަރަކާތްތެރިވާ ޖަމްޢިއްޔާތަކުގެ މަސައްކަތްތައް ހިއްސާކުރުމާއި ޚިޔާލު ހުށަހެޅުމުގެ ފުރުޞަތު ލިބިގެންދާނެއެވެ.

މިނިސްޓަރ ޝަހީމް ވިދާޅުވި ގޮތުގައި، ރާއްޖެ އިސްލާމްވިތާ 900 އަހަރާ ގާތްވަމުންދާއިރު، މިހާރު ކުރިމަތިވެފައިވާ ގޮންޖެހުންތަކަކީ ކުރިން ދިމާވެފައިނުވާ ފަދަ ބޮޑެތި ގޮންޖެހުންތަކެކެވެ. މި ގޮންޖެހުންތަކާ ކުރިމަތިލުމަށްޓަކައި، ރާއްޖޭގެ އިސްލާމީ ސައްޙަ ޢަޤީދާ ހިމާޔަތްކޮށް، ދީނީ އެއްބައިވަންތަކަން ނަގަހައްޓައި، އިސްލާމީ ޝަޚްޞިއްޔަތު ދެމެހެއްޓުމަށް ހުރިހާ ފަރާތްތަކެއް ގުޅިގެން މަސައްކަތްކުރުމަކީ މުހިންމު ކަމެކެވެ.