ޔަމާލްގެ ދެ ގޯލާއެކު ބާސެލޯނާ އިން ޖިރޯނާ ބަލިކޮށްލައިފި

ބާސާގެ ޒުވާން ފޯވާޑު ލަމީން ޔަމާލް

ސަތާރަ އަހަރުގެ ފޯވާޑް ލަމީން ޔަމާލް ޖެހި ދެ ގޯލާ އެކު، ބާސެލޯނާ އިން ރޭ ކުޅުނު މެޗުގައި ޖިރޯނާ 4-1 އިން ބަލިކޮށްލައިފި އެވެ.

މި މޮޅާއި އެކު ބާސެލޯނާ އިން ސްޕެނިޝް ލީގުގެ އާ ސީޒަނުގައި މޮޅުވުމުގެ ސައްތަ އިން ސައްތަ ރެކޯޑް ދަމަހައްޓައިފި އެވެ.

ހަންސީ ފްލިކްގެ ކޯޗުކަމުގައި ބާސެލޯނާ އިން މި ސީޒަނުގައި މިހާތަނަށް ކުޅުނު ފަސް މެޗުން ވެސް ވަނީ މޮޅުވެފަ އެވެ. މި މޮޅުވުމާ އެކު ބާސެލޯނާ މިހާރު ވަނީ 15 ޕޮއިންޓާ އެކު ލީގުގެ އެއްވަނައިގައި އެވެ. ދެވަނައިގައި އޮތް އެންމެ ފަހުގެ ޗެމްޕިއަން، ރެއާލް މެޑްރިޑަށް ލިބިފައި ވަނީ 11 ޕޮއިންޓެވެ.

މެޗުގެ 30 ވަނަ މިނިޓްގައި ޔަމާލް، ބާސެލޯނާގެ ފުރަތަމަ ލަނޑު ޖެހި އެވެ. އޭގެ ހަތް މިނިޓް ފަހުން، ރަފީނިއާ އާއި ރޮބަޓް ލެވަންޑޯސްކީ ގުޅިގެން އުފެއްދި އެޓޭކެއްގައި ޔަމާލް ދެވަނަ ލަނޑު ޖެހި އެވެ. ބާސެލޯނާގެ އިތުރު ދެ ލަނޑު ޖެހީ ޑެނީ އޮލްމޯ އާއި ޕެޑްރީ އެވެ. އޮލްމޯގެ ލަނޑު އައީ ދެވަނަ ހާފްގެ ކުޅުން ފެށިގެން ދެ މިނިޓް ތެރޭގައެވެ. ޕެޑްރީގެ ލަނޑު ޖެހީ މެޗުގެ 64 ވަނަ މިނިޓްގައެވެ.

ޖިރޯނާގެ ފަރާތުން ފެނިގެން ދިޔަ ހަމައެކަނި ލަނޑު ޖެހީ މެޗުގެ 80 ވަނަ މިނިޓްގައި ބަދަލު ކުޅުންތެރިއެއްގެ ގޮތުގައި ކުޅެން އެރި ކްރިސްޓިއަން ސްޓުއާނީ އެވެ. މެޗުގެ ފަހު މިނިޓްތަކުގައި ބާސެލޯނާގެ ފެރަން ޓޮރޭޒް އަށް ރަތް ކާޑު ދެއްކުމާ ގުޅިގެން، ބާސެލޯނާ އިން މެޗު ނިންމާލީ އެއް ކުޅުންތެރިއަކު މަދުކޮށެވެ.

ބާސެލޯނާ