އައިއެމްއެފްގެ އެހީ ބޭނުންވާނެ ކަމަކަށް ނުދެކެން: މިނިސްޓަރު ޒަމީރު

ރާއްޖެއަށް ކުރިމަތިވެފައިވާ އިގްތިސާދީ ދަތިކަމަކީ ވަގުތީ ކަމެއް ކަމަށާއި މި ހާލަތުން އަރައިގަތުމަށް އިންޓަނޭޝަނަލް މަނިޓަރީ ފަންޑް (އައިއެމްއެފް)ގެ އެހީ ހޯދަން ޖެހޭނެ ކަމަށް ގަބޫލުނުކުރައްވާ ކަމަށް ފޮރިން މިނިސްޓަރު މޫސާ ޒަމީރު ވިދާޅުވެއްޖެ އެވެ.

ޒަމީރު މިހެން ވިދާޅުވީ ފިނޭންސް މިނިސްޓަރު ޑރ. މުހައްމަދު ޝަފީގާ އެކު ސްރީ ލަންކާއަށް ކުރައްވަމުންގެންދަވާ ދަތުރުގައި އެ ގައުމުގެ މަރުކަޒީ ބޭންކާއި ދާއިރާގެ އެހެން ބޭފުޅުންނާ ބައްދަލުކުރެއްވުމަށް ފަހު އިއްޔެ ނޫސްވެރިންނަށް ދެއްވި ބަސްދީގަތުމެއްގަ އެވެ. މި ބައްދަލުވުމުގައި ޒަމީރު ވިދާޅުވީ ދަރަނި އަދާކުރަން ޓެކްސް ބޮޑުކުރުމުގެ މަސައްކަތް ސަރުކާރުން ކުރަމުން އަންނަ ކަމަށެވެ.

ޒަމީރުގެ މި ބަސްފުޅު އައިސްފައިވަނީ ބޭރުން ފައިސާ ނުލިބިއްޖެ ނަމަ ދަރަނި ނުދެއްކޭ ފަދަ ހާލަތަކަށް ރާއްޖެ ދިއުމުގެ ފުރުސަތު ވަރަށް ބޮޑު ކަމަށް ލަފާކޮށް ދުނިޔޭގެ ކްރެޑިޓް ރޭޓިން އެޖެންސީ، މޫޑީސްއިން މިދިޔަ ބުދަދުވަހު ރާއްޖޭގެ ރޭޓިން ދަށްކޮށްފައި ވަނިކޮށެވެ. މޫޑީސްއިން ވަނީ ރާއްޖެއަށް ދީފައިވާ ސީއޭއޭ-1 ރޭޓިން މުރާޖައާކޮށް، ރާއްޖޭގެ ރޭޓިން ސީއޭއޭ-2އަށް ދަށްކޮށްފައެވެ. މިއީ މާލީ ހާލަތު ދަށް އަދި ދަރަނި ނުދެއްކިދާނެ ފަދަ ހާލަތެއް އޮންނަ ގައުމުތަކަށް ދޭ ރޭޓިންއެކެވެ.

މީގެ އިތުރުން، ފިޗް ރޭޓިންގްސްއިން ވެސް ވަނީ މި އަހަރު ދެ ފަހަރެއްގެ މަތިން ރާއްޖެއަށް ދީފައި އޮތް ކްރެޑިޓް ރޭޓިން ދަށްކޮށްފައެވެ. އެގޮތުން ޖޫންގައި 'ބީ މައިނަސް'އިން 'ސީސީސީ ޕްލަސް'އަށް އަދި އޮގަސްޓުގައި 'ސީސީސީ ޕްލަސް'އިން 'ސީސީ'އަށް ރާއްޖޭގެ ރޭޓިން ދަށްކޮށްފައިވެއެވެ.

މި ހުރިހާ ކަމަކާ އެކުވެސް، ފޮރިން މިނިސްޓަރު ޒަމީރު ދެކެވަޑައިގަންނަވާ ގޮތުގައި ރާއްޖެއަށް ކުރިމަތިވެފައިވާ އިގްތިސާދީ ގޮންޖެހުންތަކަކީ ވަގުތީ ކަންކަމެވެ. އަދި މި ހާލަތުން އަރައިގަތުމަށް އައިއެމްއެފްގެ އެހީތެރިކަން ހޯދަން ޖެހޭނެ ކަމަކަށް ސަރުކާރުން ނުދެކެއެވެ.