ހައްޖު ކޯޕަރޭޝަންގެ އޮފީސް އިމާރާތުގެ ބިންގާ އަޅައިފި

މޯލްޑިވްސް ހައްޖު ކޯޕަރޭޝަން ލިމިޓެޑްގެ އޮފީސް އިމާރާތުގެ ބިންގާ މިއަދު އަޅައިފިއެވެ

9 ބުރިއަށް ހަދާ މި އޮފިީސް އިމާރާތުގެ ބިންގާ އެޅުމުގެ ރަސްމިއްޔާތު މިއަދު ހެނދުނު 9 ޖަހާއިރު ހުޅުމާލޭގައި ބާއްވާފައިވާއިރު، މި އިމާރާތުގެ ބިންގާ އަޅުއްވައިދެއްވީ ކުންފުނީގެ ޗެއާރމަން އަދި މެނޭޖިންގ ޑިރެކްޓަރާއި ބޯޑު މެންބަރުންނާއެކު ކުންފުނީގެ އިސްވެރިންނެވެ.

މި ރަސްމިއްޔާތުގައި ވާހަކަފުޅު ދައްކަވަމުން ހައްޖު ކޯޕަރޭޝަންގެ މެނޭޖިންގ ޑިރެކްޓަރ މުޙައްމަދު ޝަކީލް ވިދާޅުވީ ހައްޖު ކޯޕަރޭޝަނަކީ ކުޑަ ކުންފުންޏެއް ނޫން ކަމަށާއި، އެއީ ކުންފުނީގެ އަމިއްލަ ޒާތުގައި ކުންފުނި ހިންގުމުގެ ޤާބިލްކަން ހުންނަންޖެހޭ ބޮޑު ކުންފުންޏެއް ކަމަށެވެ.

ވޭތުވެދިޔަ 11 އަހަރު ތެރޭގައި އަޅުގަނޑުމެންނަށް ފެނިގެން ގޮސްފައި މިވަނީ، ހައްޖު ކޯޕަރޭޝަން އެންމެ ރަނގަޅު ގޮތުގައި ހިންގާފައިނުވާތީވެ، އަބަދުވެސް ސަރުކާރަށް ވަރަށް ބޮޑަށް ބަރޯސާވެގެން ހިންގަންޖެހޭ ކުންފުންޏެއްގެ ގޮތުގައި. އެހެންނަމަވެސް ރައީސް ޑރ މުޙައްމަދު މުޢިއްޒު އަޅުގަނޑު ހައްޖު ކޯޕަރޭޝަންގެ މެނޭޖިންގ ޑިރެކްޓަރުގެ މަޤާމަށް އެޕޮއިންޓް ކުރުމަށްޓަކައި އަޅުގަނޑު ގެންދަވާފަ ހައްޖު ކޯޕަރޭޝަން ކޮޅަށް ޖައްސަވަން އެދިލެއްވި. އެހެންކަމުން، އިދާރަކުރެއްވިއްޔާ އެ މަސައްކަތް މިއަދު ފެށިގެން މި ދިޔައީ - ޝަކީލް ވިދާޅުވިއެވެ.

މީގެ އިތުރަށް ޝަކީލް ވިދާޅުވީ ކުރިއަށް އޮތް މަދު ދުވަސްތަކެއްގެ ތެރޭގައި ވަރަށް ގިނަ ޕްރޮޖެކްޓްތަކެއް ފެށިގެންދާނެ ކަމަށާއި، އެގޮތުން ހުޅުމާލޭގައި ލަގްޒަރީ ރެޒިޑެންޝަލް އިމާރާތެއް އެޅުމަށްޓަކައި ވާންޖެހޭ އިދާރީ ތައްޔާރީތަކުގެ މަސައްކަތް މިހާރުވެސް ކުރެވެމުންދާ ކަމަށެވެ.

މާތް ﷲ ގެ ހެޔޮ ރަޙްމަތާއެކު، ރައީސް ޑރ މުޙައްމަދު މުޢިއްޒުގެ އެދިވަޑައިގަތުމާ އެއްގޮތަށް ހައްޖު ކޯޕަރޭޝަންގެ އެންމެހާ ކަންތައްތައް ކުރިއަށް ގެންދާނަން. އަދި ހައްޖު ކޯޕަރޭޝަންގައި ހިނގާ ހުރިހާ ކަންކަމަކީވެސް ދެ ފުށް ފެންނަ ގޮތަށް ރައްޔިތުންނަށް ފޯރުކޮށްދެވޭނެ ޚިދުމަތްތަކެއްގެ ގޮތުގައި ވެގެންދާނެ ކަމުގެ ޔަޤީންކަންވެސް އަޅުގަނޑު އަރުވަން - ޝަކީލް ވިދާޅުވިއެވެ.

މި އިމާރާތް 18 މަސްދުވަސް ތެރޭގައި ނިންމުމަށް ހަމަޖެހިފައިވާއިރު، އިމާރާތް ނިމުމާއެކު ހައްޖު ކޯޕަރޭޝަންގެ ހުރިހާ މަސައްކަތްތައް ކުރިއަށްދާނީ މި އިމާރާތުގައެވެ. މީގެ އިތުރުން، އިމާރާތުގެ ބައެއް ފްލޯތައް ކުއްޔަށް ދީގެން އިތުރު އާމްދަނީ ހޯދުމަކީވެސް ކުންފުނީގެ އެއް ވިސްނުމެވެ.