މަޖިލިސް ލިބިއްޖެ ނަމަ ހުރިހާ ވަޢުދެއް ފުއްދާނަން - ރައީސް

ކުރިއަށް އޮތް 20 ވަނަ ރައްޔިތުންގެ މަޖިލީހުގެ އިންތިހާބުގައި ސަރުކާރަށް މެޖޯރިޓީ ލިބުން ވަރަށް މުހިންމު ކަމަށާއި އޭޕްރީލް 21 ވަނަ ދުވަހު ރައްޔިތުން އެ ޖަހާ ފާހަގައަކި ރާއްޖޭގެ ތަރައްޤީއަށް ޖަހާ ފާހަގައެއް ކަމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވިދާޅުވެއްޖެއެވެ.

ރައްޔިތުންގެ ފަރާތުން އެމަނިކުފާނު އެދިވަޑައިގަތީ އެމަނިކުފާނުގެ ސިޔާސަތުތަކުގައި ކުލަޖެއްސުމަށް މަޖިލީހުގެ ތެރެއިން ސަރުކާރަށް އަންނަ ހުރަސްތައް ނައްތާލަން އެހީތެރިވެ ދެއްވުމަށް ކަމަށް ވެސް އެމަނިކުފާނު ވިދާޅުވިއެވެ. އެގޮތުން މަޖިލީހުގެ މެޖޯރިޓީ ހޯދުމަކީ ވަރަށް މުހިންމު ކަމެއް ކަމަށް އެމަނިކުފާނު ވިދާޅުވިއެވެ.

ރައީސް ވިދާޅުވީ އޭޕްރީލް 21 ވަނަ ދުވަހު ބާއްވާ މަޖިލިސް އިންތިހާބުގައި ރައްޔިތުން ޖަހާ ފާހަގައަކީ ގައުމުގެ ހަމަޖެހުމަށް، ގައުމުގެ ތަރައްޤީއަށް ޖެހާ ފާހަގައަކަށް ވާނެ ކަމަށެވެ.

"ތި ބޭފުޅުން 21 އޭޕްރީލްގައި ޖަހާ ފާހަގައަކީ ތަރައްޤީގެ ފާހަގައެއް." ރައީސް ވިދާޅުވިއެވެ.

ގައުމަށް ހަމަޖެހުން ގެންނަން އެމަނިކުފާނު މަސައްކަތްކުރި ނަމަވެސް، ތާއަބަދު ކެނޑިނޭޅި ބަދަލު ހިފުމުގެ ރޫހު ގެންގުޅޭ މަންޒަރު ފެނިގެންދާކަން ރައީސް ވަނީ ފާހަގަކޮށްފައެވެ. އެގޮތުން ގައުމުގެ ތަރައްޤީއަށް ކުރިޔަށް ގެންދާ މަޝްރޫޢުތަކަށް އިދިކޮޅުން ހުރަސް އަޅަމުންދާކަމަށް ރައީސް ވިދާޅުވިއެވެ. މަޖިލީހުގައި އިދިކޮޅު މެޖޯރިޓީ އޮތުމުގެ ފައިދާ ފުރިހަމަ ގޮތުގައި ނަގަމުންދާކަން ރައީސް ފާހަގަކޮށްލިއެވެ.