މުދަލު ޒަކާތުގެ ގޮތުގައި ބޮލަކަށް ޖެހޭ ނިސްބަތް މި އަހަރު އިތުރުވެއްޖެ

މުދަލު ޒަކާތުގެ ގޮތުގައި ލިބުނު ފައިސާއިން، މި އަހަރު ބޮލަކަށް ޖެހޭ ނިސްބަތް އެހެން އަހަރުތަކަށް ވުރެ ގިނަވެއްޖެ އެވެ.

ޒަކާތު ހައުސްއިން މިއަދު ހާމަކުރި މަޢުލޫމާތުގައިވާ ގޮތުން، މި އަހަރު ފަގީރުންނާއި މިސްކީނުންގެ ގޮތުގައި ދަފްތަރުވެފައިވާ މީހުންނަށް ބޮލަކަށް 4،000 ރުފިޔާ ބަހާނެ އެވެ.

އިސްލާމިކް މިނިސްޓްރީގެ ދަށުން ހިންގާ ޒަކާތު ހައުސްއިން ބުނި ގޮތުގައި، ފަގީރުންނާއި މިސްކީނުންގެ ގޮތުގައި ދަފްތަރުވެފައިވާ 3،193 މީހުންގެ އެކައުންޓުތަކަށް ފައިސާ ޖަމާކުރަން މިއަދު ވަނީ ފަށާފައެވެ. މިއީ މުދަލު ޒަކާތުގެ ފައިސާ ފަގީރުންނާއި މިސްކީނުންނަށް ސީދާ ގޮތުން އެންމެ ގިނައިން ބޮލަކަށް ބަހާ އަހަރު ކަމަށް އެ އިދާރާއިން ފާހަގަކޮށްފައިވެ އެވެ.

ޒަކާތު ހައުސްއިން ދިން މަޢުލޫމާތުގައިވާ ގޮތުން، މިދިޔަ އަހަރު ބެހީ ބޮލަކަށް 3،500 ރުފިޔާ އެވެ. އަދި 2022 ވަނަ އަހަރު ބޮލަކަށް 3،000 ރުފިޔާ ބެހިއިރު، އޭގެ ކުރީ އަހަރު ބެހީ 2،700 ރުފިޔާ އެވެ. މި ތަފާސްހިސާބުތަކުން ދައްކާ ގޮތުގައި، ފާއިތުވި އަހަރުތަކާ އަޅާބަލާއިރު މި އަހަރު ބޮލަކަށް ޖެހޭ މިންވަރު ވަނީ އިތުރުވެފައެވެ.

ޒަކާތުގެ ފައިސާއިން ސީދާ މިގޮތަށް ދޭ ފައިސާގެ އިތުރުން އެހެން ހޭދަތައް ވެސް ކުރާ ކަމަށް ޒަކާތު ހައުސްއިން ބުނެއެވެ. އޭގެ ތެރޭގައި ޒަރޫރީ ބޭނުންތަކަށް އެހީ ދިނުމާއި ބޭސްފަރުވާ ކުރުމަށް އަދި ހާއްސަ ހާލަތްތަކާއި ކުއްލި ހާލަތު މެދުވެރިވެގެން ދޭ އެހީތައް ހިމެނެ އެވެ. އަދި ޒަކާތު ފަންޑުން މި އަހަރު އެންމެ ގިނަ ފައިސާ ހޭދަކުރީ ބޭސްފަރުވާގެ އެހީއަށް ކަމަށާއި، އެ ފަންޑުން 16.7 މިލިޔަން ރުފިޔާ ބޭސްފަރުވާއަށް ދީފައިވާ ކަމަށް ވެސް އެ އިދާރާއިން ހާމަކޮށްފައިވެ އެވެ.

ޒަކާތު ހައުސްއިން މުދަލު ޒަކާތުގެ ނިސާބުގެ ގޮތުގައި މިހާރު ކަނޑައަޅާފައި ވަނީ 9،353.40 ރުފިޔާ އެވެ. މުދަލު ޒަކާތް ބަލައިގަންނަނީ މޯލްޑިވްސް އިންލެންޑް ރެވެނިއު އޮތޯރިޓީ (މީރާ) އިންނެވެ.