ޒަޔަނިސްޓް އިސްރާއިލުން އިއްތިޙާދުގެ ވެރިޔާ އެޤައުމަށް ވަނުން މަނާކޮށްފި

ޔޫރަޕިއަން ޔޫނިއަންގެ ޚާރިޖީ ސިޔާސަތުގެ އިސްވެރިޔާ ޖޮސެޕް ބޮރެލް އިސްރާއީލަށް ކުރަން ހަމަޖެހިފައިވާ ދަތުރަށް އިސްރާއިލުން ހުރަސް އެޅުމުން ކެންސަލްކުރަން ޖެހިއްޖެއެވެ.  

އިސްރާއިލުގެ މީޑިއާއިން ރިޕޯޓްކޮށްފައިވާ ގޮތުގައި ބޮރެލް ދަތުރަށް ހުރަސް އަޅާފައިވަނީ އިސްރާއީލުގެ ޚާރިޖީ ވަޒީރު އިޒްރާއެލް ކަޓްޒް އެވެ. އޭނާ ވަނީ ބޮރެލް އިސްރާއިލަށް ޒިޔާރަތްކުރުމަށް ބޭނުންވަ ހުއްދަ ދިނުމަށް އިންކާރުކޮށްފައެވެ.

ބޮރެލް ވަނީ އިސްރާއީލުގެ ބައެއް ވަޒީރުންގެ މައްޗަށް ފިޔަވަޅު އެޅުމަށް ގޮވާލާފައެވެ. އަދި ޣައްޒާގައި ހިނގަމުންދާ ހަނގުރާމައާ ގުޅޭގޮތުން ކަންބޮޑުވުން ފާޅުކޮށްފައެވެ. މި ދަތުރު ކެންސަލްވުމުން، އިސްރާލާއި ޔޫރަޕިއަން ޔޫނިއަނާ ދެމެދު އޮތް ގުޅުން އިތުރަށް ގޯސްވެދާނެކަމަށް ބެލެވެއެވެ.

މި ހާދިސާއާ ގުޅިގެން ބައިނަލްއަޤްވާމީ މުޖުތަމަޢުން ޣައްޒާގައި ހިނގަމުންދާ ހަނގުރާމަ ވަގުތުން ހުއްޓުވުމަށް ގޮވާލާފައިވެއެވެ. އިސްރާއީލުން ވަނީ އޮކްޓޯބަރު މަހު ހަމާސްގެ ހަމަލާއަކަށްފަހު ޣައްޒާއަށް ހަނގުރާމަ އިއުލާންކޮށްފައެވެ. މިހާތަނަށް 41،100 އަށްވުރެ ގިނަ މީހުން ވަނީ ޝަހީދުވެފައެވެ. އަދި 95،100 އަށްވުރެ ގިނަ މީހުންނަށް ވަނީ އަނިޔާވެފައެވެ.

ބޮރެލް ވަނީ އިއްޔެ ޣައްޒާގެ ނުސައިރާތު ކޭމްޕުގައި ހުރި އދ. ގެ ސްކޫލަކަށް އިޒްރޭލުން ދިން ވައިގެ ހަމަލާއެއްގައި މަދުވެގެން 18 މީހުން މަރުވެފައިވާތީ ކަންބޮޑުވުން ފާޅުކޮށްފައެވެ. މީގެ ކުރިން ބޮރެލް ވަނީ އިސްރާއީލުން ޣައްޒާއަށް އިންސާނީ އެހީ ވަނުން ހުއްޓުވައި، ބަނޑުހައިހޫނުކަން ހަތިޔާރެއްގެ ގޮތުގައި ބޭނުންކުރަމުންދާ ކަމަށް ތުހުމަތުކޮށްފައެވެ.

ބޮރެލް މިވަގުތު ހުންނެވީ ސަރަޙައްދީ ދަތުރެއްގައެވެ. މި ދަތުރުގައި އޭނާ މިސުރާއި ލުބުނާނަށް ޒިޔާރަތްކޮށް، ޣައްޒާގައި ހިނގަމުންދާ ހަނގުރާމައާ ގުޅޭގޮތުން މަޝްވަރާކުރަމުންދެއެވެ.