ފުލުހުން ހިންގި ޑްރަގް އޮޕަރޭޝަނެއްގައި ފަސް މީހުން ހައްޔަރުކޮށްފި

ފުލުހުންގެ ޑްރަގް އެންފޯސްމަންޓާއި ކައުންޓާ ނާކޮޓިކްސް އިންޓެލިޖެންސް އަދި ނޯތު ޕޮލިސް ގުޅިގެން ޅ. ހިންނަވަރާއި ނައިފަރުގައި ހިންގި ޑްރަގް އޮޕަރޭޝަނެއްގައި ފަސް މީހުން ހައްޔަރުކޮށްފިއެވެ.

އިއްޔެ ހިންގުނު މި އޮޕަރޭޝަނުގައި 12 ތަނެއް ބަލައިފާސްކޮށްފައިވާކަމަށް ފުލުހުން މިއަދު ނެރުނު ނޫސްބަޔާނުގައި ބުނެފައިވެއެވެ. މި އޮޕަރޭޝަނުގައި މަސްތުވާތަކެތި ކަމަށް ބެލެވޭ 86.26 ގްރާމްގެ އެއްޗެއް ފެނިފައިވާކަމަށާއި، އޭގެ އިތުރުން 293،000 ރުފިޔާއާއި ޑޮލަރު އަދި ޔޫރޯ ފެނިފައިވާކަމަށް ފުލުހުން ބުނެފައިވެއެވެ.

ހައްޔަރުކުރެވުނު ފަސް މީހުންނަކީ:

1. ހުސެއިން އީސާ ފުޅު (48 އަހަރު، ޅ. ހިންނަވަރު / އަގީދުގެ)

2. އަޙްމަދު މުޙައްމަދު (36 އަހަރު، ޅ. ހިންނަވަރު / މިދިލިމާގެ)

3. އަބްދުﷲ ޒަކަރިއްޔާ (46 އަހަރު، ޅ. ނައިފަރު / ޑޭޒީހިޔާ)

4. މުހައްމަދު އިރުޝާދު (35 އަހަރު، ޅ. ހިންނަވަރު / ފެހިގެ)

5. ފާތިމަތު ރީމާ (44 އަހަރު، އދ. މަހިބަދޫ / ކުޅިބަލާގެ)

މި ފަސް މީހުންގެ ބަންދާމެދު ގޮތެއް ނިންމުމަށް ކޯޓަށް ހާޒިރުކުރުމުން، ކޯޓުން ވަނީ އެ ހުރިހާ އެންމެނަށް ވެސް މުއްދަތު ޖަހައިދީފައެވެ. އެގޮތުން ހުސައިން އީސާ ފުޅު އަދި އަހުމަދު މުހައްމަދު 7 ދުވަހަށް، އަބްދުﷲ ޒަކަރިއްޔާ 15 ދުވަހަށް، ފާތިމަތު ރީމާ 12 ދުވަހަށް، އަދި މުހައްމަދު އިރުޝާދު 3 ދުވަހަށް ބަންދުކުރުމަށް ކޯޓުން އަމުރުކޮށްފައިވެއެވެ.

މި މައްސަލަ ފުލުހުން ދަނީ ތަޙުޤީޤުކުރަމުންނެވެ. މި އޮޕަރޭޝަނުގައި މި ފަސް މީހުންގެ އިތުރުން ވެސް އިތުރު މީހުން ބަލައިފާސްކޮށްފައިވާކަމަށް ފުލުހުން ބުނެފައިވެއެވެ.