އާސަންދަ ކަނޑާލި ކަމަށް ބުނެ ދައުރުވާ މައުލޫމާތަކީ ހަގީގަތާ ޚިލާފު ވާހަކަތަކެއް: އާސަންދަ

އާސަންދައިގެ ދަށުން ބެންގަލޫރުގެ އެސްޓާ ސީއެމްއައި ހޮސްޕިޓަލުން ފަރުވާ ހޯދަމުން ދިޔަ ބަލިމީހަކަށް އާސަންދަ "އެއްކޮށް" ކަނޑާލައި އާއިލާއެއް ހާލުގައި ޖެއްސި ކަމަށް ބުނެ ސޯޝަލް މީޑިއާގައި ދައުރުވަމުންދާ މައުލޫމާތަކީ ހަގީގަތާ ޚިލާފު ވާހަކަތަކެއް ކަމަށް އާސަންދަ ކުންފުނިން މިއަދު ބުނެފިއެވެ.

އާސަންދައިން ނެރުނު ބަޔާނުގައި ބުނެފައިވަނީ، މިދިޔަ މަހުގެ 18 ވަނަ ދުވަހުގެ ނިޔަލަށް ފަރުވާގެ އަގަށް ހޮސްޕިޓަލުން ފޮނުވި ބިލުގައިވާ 89،339.91 ޑޮލަރުގެ ތެރެއިން 85،989.15 ޑޮލަރު ހަމަޖައްސަން ހުއްދަ ދީފައިވާ ކަމަށެވެ. މިއީ އާސަންދައިން ކަވަރު ނުކުރާ ޗާޖުތައް އުނިކުރުމަށް ފަހު ކަމަށް ވެސް އެ ބަޔާނުގައި ބުނެފައިވެއެވެ.

އާސަންދައިން މައުލޫމާތު ދީފައިވާ ގޮތުގައި، މި ބަލިމީހާއަށް ފަރުވާ ދެމުން ދިޔައީ ހައިޕޮކްސިކް އިސްކެމިކް އެންސެފަލޯޕެތީއަށެވެ. މިއީ ސިކުނޑިއަށް ލޭ ދައުރުވުން ހުއްޓުމުން ކިޔާ ބައްޔެކެވެ. ބަލިމީހާއަށް ފަރުވާ ދިނުމަށް ބެންގަލޫރު ހޮސްޕިޓަލުގައި އެޑްމިޓްކުރުމަށް އެ ހޮސްޕިޓަލުން އާސަންދައަށް ރިކުއެސްޓް ފޮނުވާފައިވަނީ މާރިޗު 14 ގައެވެ.

އާސަންދައިން އިތުރަށް ބުނެފައިވަނީ، ގާތްގަނޑަކަށް ފަސް މަސްދުވަހުގެ މުއްދަތަށް ފަހު ބަލިމީހާގެ ހާލަތަށް ބަދަލެއް ނައުމުން، ވެންޓިލޭޓަރު ސަޕޯޓާ އެކު ރާއްޖެ ގެނެސް ފަރުވާ ދިނުމަށް މިދިޔަ މަހުގެ 14 ވަނަ ދުވަހު އާއިލާއާ ވާހަކަ ދައްކާފައިވާ ކަމަށެވެ. އަދި ރާއްޖޭގައި އަލްޓަނޭޓިވް އޮޕްޝަންތައް ހުރިކަމާއި، ދިގު މުއްދަތަކަށް ރިހެބިލިޓޭޝަން ދިނުމަކީ އާސަންދައިން ކަވަރުކޮށްދޭ ކަމެއް ނޫންކަން އާއިލާއަށް ކިޔައިދީފައިވާ ކަމަށް ވެސް އާސަންދައިން ބުނެފައިވެއެވެ. މީގެ އިތުރުން ރާއްޖޭގައި ފަރުވާ ދެވޭނެ ގޮތުގެ ޕްލޭނެއް ވެސް އާއިލާއާ ހިއްސާކޮށްފައިވާ ކަމަށް އާސަންދައިން މައުލޫމާތު ދީފައިވެއެވެ.