ހުއްދަނެތި ޑޮލަރު މާރުކުރާ ދެ ވިޔަފާރިއެއްގެ ޙަރަކާތްތައް ހުއްޓުވައިފި

މާލޭގައި ހުއްދަނެތި ޑޮލަރު މާރުކުރާ ދެ ވިޔަފާރިއެއްގެ ޙަރަކާތްތައް ހުއްޓުވައިލައިފިއެވެ.

ޤާނޫނާ ޚިލާފަށް ބޭރު ފައިސާ މާރުކުރަމުންދިޔަ މި ދެ ވިޔަފާރިއެއްގެ ޙަރަކާތްތައް ހުއްޓުވާފައިވަނީ ފުލުހުންނާއި އިކޮނޮމިކް މިނިސްޓްރީ ގުޅިގެން ހިންގި ދެ އޮޕަރޭޝަނެއްގައެވެ.

މި މަހުގެ 3 ވަނަ ދުވަހު ހިންގި ފުރަތަމަ އޮޕަރޭޝަނުގައި، "ޓްރާންސްފާ މޯލްޑިވްސް" ގެ ނަމުގައި ހުއްދަ ނެތި ބޭރު ފައިސާ މާރުކުރަމުންދިޔަ ވިޔަފާރިއެއް ހުއްޓުވައި، އިކޮނޮމިކް މިނިސްޓްރީން ވަނީ ނޯޓިސްއެއް ހަރުކޮށްފައެވެ. އަދި އިއްޔެ ކުރިއަށްގެންދިޔަ ދެވަނަ އޮޕަރޭޝަނުގައި، ޗާންދަނީމަގުގައި ހުންނަ ކާޝިބޯޓް ސުވެނިޔަ ފިހާރައިން އެމްއެމްއޭގެ ހުއްދަ ނެތި ބޭރު ފައިސާ ގަނެވިއްކަމުންދާކަން ފާހަގަކުރެވި، އެ ފިހާރައިގެ ވިޔަފާރި ހުއްދަ ވަގުތީގޮތުން ބާޠިލުކުރެވުނެވެ.

މީގެ އިތުރުން، ބޭރު ފައިސާ މާރުކުރުމުގެ ޚިދުމަތްދޭ އެހެން ބައެއް ތަންތަން ބަލައި ފާސްކޮށް، އިޞްލާޙުކުރަންޖެހޭ ކަންކަން އިޞްލާޙުކުރުމަށް އިރުޝާދު ދެވުނު ކަމަށް ފުލުހުން މަޢުލޫމާތު ދީފައިވެއެވެ. މި އޮޕަރޭޝަންތަކުގެ މަޤްޞަދަކީ ޤާނޫނާއި ގަވާއިދާ އެއްގޮތަށް ބޭރު ފައިސާގެ މުޢާމަލާތްތައް ކުރިއަށްގެންދިއުން ކަށަވަރުކުރުން ކަމުގައި ބެލެވެއެވެ.

ފުލުހުންނާއި އިކޮނޮމިކް މިނިސްޓްރީން މިފަދަ އޮޕަރޭޝަންތައް ކުރިއަށް ގެންދިއުމުން، ޤާނޫނާ ޚިލާފަށް ހިންގާ ބޭރު ފައިސާގެ މުޢާމަލާތްތައް މަދުވެ، ރަސްމީ ނިޒާމުގެ ތެރެއިން ބޭރު ފައިސާގެ މުޢާމަލާތްތައް ހިންގުމަށް މަގުފަހިވާނެ ކަމަށް އިޤްތިޞާދީ މާހިރުން ލަފާކުރެއެވެ.