ރައީސް މުއިއްޒު އިންޑިއާއަށް ދަތުރުފުޅެއް ކުރައްވަން ނިންމަވައިފި

ރައީސް މުހައްމަދު މުއިއްޒު އިންޑިއާއަށް ދަތުރުފުޅެއް ކުރައްވަން ނިންމަވައިފިކަމަށް ރައީސް އޮފީހުން މިއަދު ހާމަކުރައްވައިފިއެވެ.

މި މަޢުލޫމާތު ހާމަކުރެއްވީ ރައީސް އޮފީހުގައި މިއަދު ބޭއްވި ނޫސްވެރިންގެ ބައްދަލުވުމެއްގައި ރައީސް އޮފީހުގެ ތަރުޖަމާނު ހީނާ ވަލީދެވެ.

ހީނާ ވިދާޅުވި ގޮތުގައި ރައީސްގެ މި ދަތުރުފުޅު ކުރައްވާނެ ސީދާ ތާރީޚެއް އަދި ކަނޑައަޅުއްވާފައި ނުވާ ކަމަށާއި، އެކަމާ ގުޅޭ މަޝްވަރާތައް މިހާރު ދިވެހިރާއްޖެއާއި އިންޑިއާއާ ދެމެދު ކުރިއަށްދާ ކަމަށެވެ. ނަމަވެސް، މި ދަތުރުފުޅާ ބެހޭ އިތުރު އެއްވެސް ތަފްސީލެއް ހީނާ ހާމަކުރައްވާފައެއް ނުވެއެވެ.

މިއީ ރައީސް މުއިއްޒު ވެރިކަމާ ހަވާލުވެވަޑައިގެންނެވި ފަހުން އިންޑިއާއަށް ވަޑައިގަންނަވާ ދެވަނަ ފަހަރެވެ. އެމަނިކުފާނު އެންމެ ފުރަތަމަ އިންޑިއާއަށް ވަޑައިގެންނެވީ މިދިޔަ ޖޫން މަހުގައި، އިންޑިއާގެ ބޮޑުވަޒީރު ނަރެންދުރަ މޯދީ ތިންވަނަ ފަހަރަށް ހުވާކުރެއްވުމުގެ ރަސްމިއްޔާތުގައި ބައިވެރިވެވަޑައިގަތުމަށެވެ.

އެ ދަތުރުފުޅުގައި ރައީސް މުއިއްޒު ޒު ވަނީ އިންޑިއާގެ ރައީސް ދުރޫޕަދީ މުރުމޫއާ ބައްދަލުކުރައްވައި ދެ ގައުމުގެ ގުޅުން އިތުރަށް ބަދަހިކުރެއްވުމުގެ މަޝްވަރާތައް ކުރައްވާފައެވެ. އަދި އިންޑިއާގެ އެކްސްޓާނަލް އެފެއާޒް މިނިސްޓަރު ސުބްރަމާނިއަމް ޖަޔަޝަންކަރު ވެސް ވަނީ ރައީސްގެ އަރިހަށް އިހުތިރާމުގެ ޒިޔާރަތެއް ކުރައްވާފައެވެ.

ފާހަގަކޮށްލެވޭ ކަމަކީ، އާންމުކޮށް އެހެން ރައީސުން ޢަމަލުކުރައްވަމުން ގެންދެވި ގޮތާ ޚިލާފަށް ރައީސް މުއިއްޒުގެ ފުރަތަމަ ރަސްމީ ދަތުރުފުޅުގައި އިންޑިއާގެ ބަދަލުގައި ވަޑައިގެންނެވީ ތުރުކީއަށް ކަމެވެ. އޭގެ ފަހުން އެމަނިކުފާނު ވަނީ ޗައިނާއަށް ވެސް ދަތުރުފުޅެއް ކުރައްވާފައެވެ.

މި ދަތުރުފުޅަކީ ދިވެހިރާއްޖެއާއި އިންޑިއާއާ ދެމެދު އޮންނަ ގުޅުން އިތުރަށް ހަރުދަނާކުރުމަށް މަގުފަހިވެގެންދާނެ ދަތުރުފުޅެއް ކަމަށް ސިޔާސީ ދާއިރާގެ މާހިރުން ލަފާކުރެއެވެ.