ޣައްޒާގައި ޝަހީދުވި މީހުންގެ އަދަދު 34،800 އަށް ވުރެ މައްޗަށް އަރައިފި

ޣައްޒާގައި އަދިވެސް ދަނީ ހުއްޓުމެއް ނެތި ޙަމަލާ ދެމުން

އިސްރާއީލުން ޣައްޒާއަށް ދެމުން ގެންދާ ހަމަލާތަކުގައި ޝަހީދުވި ފަލަސްތީނުގެ މީހުންގެ އަދަދު 34،844 އަށް އަރާފައިވާ ކަމަށް އެންކްލޭވްގެ ހެލްތު މިނިސްޓްރީން ބުނެފިއެވެ. އަދި މި ހަމަލާގައި އިތުރު 78،404 މީހުން މިހާތަނަށް ޒަހަމްވެފައިވާ ކަމަށް މިނިސްޓްރީން ބުނެއެވެ.

"ފާއިތުވި 24 ގަޑިއިރުގެ ތެރޭގައި އެކަނިވެސް އިސްރާއީލުގެ ހަމަލާތަކުގައި 55 މީހުން ޝަހީދުވެ 200 މީހުން ޒަޚަމްވި ކަމަށް އެ މިނިސްޓްރީން ބުންޏެވެ.

އަދި ސަލާމަތްކުރާ މީހުންނަށް އެމީހުންނާ ހަމައަށް ނުދެވުމުގެ ސަބަބުން އަދިވެސް ގިނަ ބަޔަކު ތިބީ ކުނިތަކުގެ ދަށުގައި ތާށިވެފައި ކަމަށް ވެސް އެ ބަޔާނުގައި ވެއެވެ.

އިރުމަތީ ރަފާހުގައި ފަލަސްތީނު މީހުން ހުސްކުރުމުގެ އަމުރެއް އިސްރާއީލުގެ އަސްކަރިއްޔާއިން އިއްޔެ ނެރެފައިވާއިރު، މިއީ ފަލަސްތީނުގެ 1.5 މިލިއަން މީހުން ދިރިއުޅެމުންދާ އެ ސިޓީއަށް އިސްރާއީލުން ހަމަލާ ދިނުމުގެ ފެށުމެއް ކަމަށް ގިނަ ބަޔަކު ދެކެއެވެ.

އަދި މިދިޔަ އަންގާރަ ދުވަހު އިސްރާއީލްގެ އަސްކަރިއްޔާއިން ވަނީ ވަށާލާފައިވާ ސަރަހައްދަށް އިންސާނީ އެހީތެރިކަން ފޯރުކޮށްދިނުމުގެ މުހިންމު މަގެއް ކަމަށްވާ މިސްރުގެ ބޯޑަރުގައި އޮންނަ ރަފާ ކްރޮސިންގެ ކޮންޓްރޯލް އަތުލައިފައެވެ.

މިދިޔަ އޮކްޓޯބަރު މަހުގެ ހަތް ވަނަ ދުވަހު ހަމާސް ޖަމާއަތުން ބޯޑަރު ހުރަސްކޮށް ދިން ހަމަލާއެއްގައި 1،200 އެއްހާ މީހުން މަރުވި ފަހުން އިސްރާއީލުން ވަނީ ޣައްޒާއަށް ވަރުގަދަ ހަމަލާތަކެއް ދީފައެވެ.

ޣައްޒާ