ހުސްވެފައިވާ ޕީޖީގެ މަޤާމަށް މީހަކު އައްޔަންކުރުމަށް ބުދަ ދުވަހުގެ ރޭ ޖަލްސާއެއް ބާއްވަނީ

ހުސްވެފައިވާ ޕްރޮސެކިއުޓަރ ޖެނެރަލްގެ މަޤާމަށް ބޭފުޅަކު އައްޔަންކުރުމަށްޓަކައި އަންނަ ބުދަ ދުވަހު ރައްޔިތުންގެ މަޖިލީހުގެ ދައުރުން ބޭރު ޖަލްސާއެއް ބޭއްވުމަށް ނިންމައިފިއެވެ.

ޕީޖީގެ މަޤާމު ހުސްވެފައިވަނީ ކުރިން އެ މަޤާމުގައި ހުންނެވި ހުސައިން ޝަމީމު މިދިޔަ މަހުގެ 22 ވަނަ ދުވަހު އިސްތިއުފާ ދެއްވުމާ ގުޅިގެންނެވެ. ޝަމީމު އިސްތިއުފާ ދެއްވީ އިތުބާރު ނެތްކަމުގެ ވޯޓު ނަގަން މަޖިލީހުން ނިންމުމާ ގުޅިގެންނެވެ.

ޕީޖީގެ މަޤާމަށް ބޭފުޅަކު އައްޔަންކުރުމަށް ބާއްވާ ދައުރުން ބޭރު ޖަލްސާ އަންނަ ބުދަ ދުވަހު ބޭއްވުމަށް ނިންމާފައިވާ ކަމަށް ޕީއެންސީގެ ޕާލިމެންޓަރީ ގްރޫޕްގެ ލީޑަރު، އިނގުރައިދޫ ދާއިރާގެ މެންބަރު އިބްރާހިމް ފަލާހު ވިދާޅުވިއެވެ.

ޕީޖީގެ މަޤާމަށް ކުރިމަތިލުމުގެ ފުރުޞަތު ހުޅުވާލާފައިވާ މުއްދަތު ހަމަވާނީ އަންނަ ބުދަ ދުވަހުގެ މެންދުރު 12:00 އަށެވެ. ޤާނޫނީ ގޮތުން ޕީޖީގެ މަޤާމު ހުސްވާތާ 30 ދުވަހުގެ ތެރޭގައި އެ މަޤާމަށް ބޭފުޅަކު އައްޔަންކުރަންޖެހެއެވެ.