ބީއެމްއެލްގެ ސީއީއޯ ކާލް ސްޓުމްކަ އިސްތިއުފާ ދެއްވައިފި
ބީއެމްއެލްގެ ސީއީއޯ ކާލް. / ފޮޓޯ:ބީއެމްއެލް)
ބޭންކް އޮފް މޯލްޑިވްސް (ބީއެމްއެލް)ގެ ސީއީއޯ ކާލް ސްޓުމްކަ އެ މަގާމުން އިސްތިއުފާ ދެއްވައިފި އެވެ.
ބީއެމްއެލް އިން މިއަދު ނެރުނު ބަޔާނެއްގައި ބުނެފައިވަނީ ކާލް އިސްތިއުފާ ދެއްވީ އިއްޔެ ކަމަށެވެ.
ކާލް އިސްތިއުފާ ދެއްވާފައިވަނީ އެ ބޭންކާއި އިދިކޮޅު ފަރާތްތަކުން މާލީ ބަގާވާތެއް ކުރަން އުޅުނު ކަމަށް ބުނާ މައްސަލައެއް ފުލުހުން ތަޙުޤީޤުކުރަމުންދާ ދަނޑިވަޅެއްގައެވެ. މި މައްސަލައާ ގުޅިގެން ފުލުހުން ވަނީ ބީއެމްއެލްއާ ސުވާލުކޮށް، ބައެއް ލިޔެކިޔުންތައް ހޯދާފައެވެ.
ބީއެމްއެލްއިން ބުނެފައިވާ ގޮތުގައި، ކާލް މަގާމުން އިސްތިއުފާ ދެއްވި ނަމަވެސް، މި މަހުގެ 21 ގައި ބޭއްވުމަށް ހަމަޖެހިފައިވާ އެ ބޭންކުގެ ޚާއްޞަ އާންމު ޖަލްސާއާ ހަމައަށް އޭނާ މަގާމުގައި ދެމިހުންނަވާނެއެވެ. ކާލް ބީއެމްއެލްގެ ސީއީއޯގެ މަގާމާ ހަވާލުވެވަޑައިގަތީ 2022 ވަނަ އަހަރުގެ އޮކްޓޯބަރު މަހުގައެވެ.
ބޭންކުން އިތުރަށް ހާމަކޮށްފައިވަނީ އައު ސީއީއޯއެއް ހޯދުމުގެ މަސައްކަތް ކުރަމުންދާ ކަމަށެވެ. އަދި އެ މަގާމަށް މީހަކު އައްޔަންކުރަންދެން ބީއެމްއެލްގެ ހިންގުމުގެ ޒިންމާ އަދާކުރައްވާނީ އެ ބޭންކުގެ ޑެޕިއުޓީ ސީއީއޯ އާއިޝަތު ނޫރައްދީން ކަމަށްވެސް ބުނެފައިވެއެވެ.
އާއިޝަތު ނޫރައްދީން ވަނީ މިދިޔަ މަހު ބީއެމްއެލްގެ ބޯޑުން އިސްތިއުފާ ދެއްވާފައެވެ. ނަމަވެސް، އޭނާ އަދިވެސް ޑެޕިއުޓީ ސީއީއޯގެ މަގާމުގައި ދެމިހުންނެވިއެވެ. އާއިޝަތު ނޫރައްދީން ބޭންކުގެ ޑެޕިއުޓީ ސީއީއޯއަކަށް އައްޔަންކުރެވުނީ 2020 ވަނަ އަހަރުގެ އޮގަސްޓު 31 ވަނަ ދުވަހުއެވެ.
ކޮމެންޓް