މާފަންނު ގެސްޓްހައުސްއެއްގައި ޒަޚަމުވެފައި އޮތް މީހަކު ފެނި، އައިޖީއެމްއެޗަށް ގެންދެވިއްޖެ

މާފަންނު ސަރަޙައްދުގައި ހުރި ގެސްޓްހައުސްއެއްގެ ކޮޓަރިއެއްގައި ޒަޚަމުވެފައި އޮތް ދިވެހި ފިރިހެނަކު ފެނި، އިންދިރާ ގާންދީ މެމޯރިއަލް ހޮސްޕިޓަލް (އައިޖީއެމްއެޗް)އަށް ގެންދެވިއްޖެއެވެ.

މޯލްޑިވްސް ޕޮލިސް ސަރވިސްއިން މީޑިއާތަކަށް ފޮނުވި މެސެޖެއްގައި ބުނެފައިވާ ގޮތުގައި، މި މީހާ ފެނުނީ އޭނާގެ ޚަބަރެއް ނުވާކަމަށް ލިބުނު މަޢުލޫމާތަކާ ގުޅިގެން ފުލުހުން އެ ގެސްޓްހައުސްއަށް ގޮސް ބެލިބެލުމުންނެވެ. ފުލުހުން އެ ކޮޓަރިއަށް ވަދެ ބެލިއިރު، ޒަޚަމުތަކަކާއެކު އޮއްވާ އެ މީހާ ވަނީ ފެނިފައެވެ.

ފުލުހުން އިތުރަށް މަޢުލޫމާތު ދެމުން ބުނެފައިވަނީ، މި މީހާއަށް ފަރުވާދެވެމުން ދަނީ  އައިޖީއެމްއެޗުގެ  އައިސީޔޫގައި ކަމަށެވެ. ނަމަވެސް، އޭނާއަށް ލިބިފައިވާ ޒަޚަމުތަކުގެ ތަފްސީލެއް ފުލުހުން އަދި ހާމަކޮށްފައެއް ނުވެއެވެ.

މި ހާދިސާ ހިނގި ތަނުގައި މިވަގުތު ފުލުހުން ހަރަކާތްތެރިވަމުންދާ ކަމަށް ފުލުހުން ބުނެފައިވެއެވެ. އަދި މި މައްސަލައިގެ ތަޙްޤީޤު ކުރިއަށްދާ ކަމަށްވެސް ފުލުހުން މަޢުލޫމާތު ދީފައިވެއެވެ.

މި މައްސަލައާ ގުޅޭ އެއްވެސް މަޢުލޫމާތެއް އާންމުންގެ ތެރެއިން އެއްވެސް ފަރާތަކަށް އެނގިވަޑައިގަންނަވާނަމަ، ފުލުހުންގެ ހޮޓްލައިން ނަންބަރު 3322111 އަށް ގުޅައި އެ މަޢުލޫމާތު ހިއްސާކޮށްދެއްވުމަށް އެދިފައިވެއެވެ.