ރޮނާލްޑޯގެ ލަނޑުން ޕޯޗުގަލް ސްކޮޓްލޭންޑް އަތުން މޮޅުވެ ގުރޫޕްގެ އެއްވަނައަށް

ޔުއެފާ ނެޝަނަލް ލީގު ގުރޫޕް އެކެއްގައި އާދިއްތަ ދުވަހުގެ ރޭ ޕޯޗުގަލް އާއި ސްކޮޓްލޭންޑް ބައްދަލުކުރި މެޗުގެ ފަހުވަގުތު ރޮނާލްޑޯ ކާމިޔާބުކޮށްދިން ގޯލާއިއެކު ސްކޮޓްލޭންޑް ބަލިކޮށް ޕޯޗުގަލުން ގުރޫޕްގެ އެއްވަނައަށް ޖެހިލައިފިއެވެ.

މެޗުގެ ފުރަތަމަ ހާފުގައި ގިނަވަގުތު ބޯޅަ ހިފަހައްޓައިގެ ކުޅެ ޕޯޗުގަލް އިން މެޗު ޑޮމިނޭޓްކުރި ނަމަވެސް މިމެޗުގައި ފުރަތަމަ ލަނޑުޖަހައި ކުރިހޯދީ ސްކޮޓްލޭންޑުންނެވެ. މިލަނޑު އެޓީމަށް ކާމިޔާބުކޮށް ނަޕޯލީގެ ތަޖުރިބާކާރު މިޑްފީލްޑަރު ސްކޮޓް މެކްޑޮމިނޭ އެވެ. މިއީ މިހާފުގައި އެޓީމުން ޕޯޗުގަލްގެ ގޯލާއި އަމާޒުކޮށް ފޮނުވާލި ހަމައެކަނި ހަމަލާއެވެ.

މެޗުގެ ދެވަނަ ހާފު ޕޯޗުގަލް އިން ފެށީ ބަދަލަކާއެކުގައެވެ. އެގޮތުން މިހާފުގައި އެޓީމުގެ ކެޕްޓަން ރޮނާލްޑޯ ކުޅެން ނުކުތްއިރު، އެޓީމުން ވަނީ ކުޅުން ރަނގަޅުކޮށް އެޓޭކުތައް އިތުރަށް ވަރުގަދަކޮށްފައެވެ. ނަތީޖާއެއްގެ ގޮތުން ދެވަނަ ހާފުގެ 54 ވަނަ މިނެޓުގައި އެޓީމުން ވަނީ ލަނޑެއް ކާމިޔާބުކޮށް މެޗުގެ ނަތީޖާ އެއްވަރުކޮށްފައެވެ. މިލަނޑު އެޓީމަށް ކާމިޔާބުކޮށްދިނީ މިޑްފީލްޑަރު ބުރޫނޯ ފެނާންޑޭޒް އެވެ.

މެޗުން ޕޯޗުގަލް މޮޅުވި ލަނޑު މެޗުގެ 88 ވަނަ މިނެޓުގައި ޖެހީ ކެޕްޓަން ކްރިސްޓިއާނޯ ރޮނާލްޑޯއެވެ. މިއީ އޭނާގެ ކެރިއަރުގައި ޖެހި 901 ވަނަ ލަނޑު އަދި ގައުމީ ޓީމަށް ޖެހި 132 ވަނަ ލަނޑެވެ.

މިނަތީޖާއާއެކު ޕޯޗުގަލް ވަނީ ދެ މެޗުން ހަ ޕޮއިންޓް ހޯދައި ގުރޫޕްގެ އެއްވަނައަށް އަރާފައެވެ. އަނެއްކޮޅުން ސްކޮޓްލޭންޑް ވަނީ ދެ މެޗުންވެސް ބަލިވެ، ޕޮއިންޓެއް ނުލިބި ގުރޫޕްގެ ފުލަށް ވެއްޓިފައެވެ.