ބިނާވެށި ޕްލޭންކުރުމާއި ހިންގުމުގެ ބިލު ރައީސުލްޖުމްހޫރިއްޔާ ތަޞްދީޤުކުރައްވައިފި

ބިނާވެށި ޕްލޭންކުރުމާއި ހިންގުމުގެ ބިލު ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު، މިއަދު ތަޞްދީޤު ކުރައްވައިފިއެވެ.

މި ބިލަކީ މިދިޔަ އޮގަސްޓް 22 ވަނަ ދުވަހު ރައްޔިތުންގެ މަޖިލީހުން ފާސްކުރެއްވި ބިލެކެވެ.

މި ޤާނޫނުގެ މައިގަނޑު މަޤްޞަދުތަކުގެ ތެރޭގައި ދިވެހިރާއްޖޭގެ ބިން އިޤްތިޞާދީ އަދި އިޖްތިމާޢީ ގޮތުން އެކަށީގެންވާ ގޮތެއްގައި ތަރައްޤީކޮށް ބެލެހެއްޓުމާއި، ލާމަރުކަޒީ އުސޫލުން އިދާރީ ދާއިރާތައް ތަރައްޤީކުރުން ހިމެނެއެވެ. އަދި ބިނާވެށި ޕްލޭންކުރުމާބެހޭ ޤައުމީ ސިޔާސަތު ކަނޑައަޅާނީ ވަޒީރުންގެ މަޖިލީހުގެ ލަފާގެ މަތިން ރައީސުލްޖުމްހޫރިއްޔާއެވެ.

ޤާނޫނުގެ ދަށުން، ބިނާވެށި ޕްލޭންތައް އެކުލަވާލައި، ތަންފީޒުކުރުމާއި ބިން ތަރައްޤީކުރުމުގެ ހުއްދަ ދޫކުރާނީ ސަރުކާރުގެ 6 އިދާރާއަކުންނެވެ. މީގެ ތެރޭގައި ހައުސިންގ މިނިސްޓްރީ، ސިޓީ އަދި ރަށު ކައުންސިލްތައް، އަދި އަރބަން، ސިނާޢީ އަދި އިޤްތިޞާދީ ޚާއްޞަ ސަރަޙައްދުތައް ޕްލޭންކުރުމަށް ކަނޑައަޅާ އިދާރާތައް ހިމެނެއެވެ.

މި ޤާނޫނުގެ ދަށުން ދިވެހިރާއްޖޭގައި ބިމެއް ތަރައްޤީކުރެވޭނީ ހަމައެކަނި ހުއްދަ ހޯދުމަށްފަހުގައެވެ.

މި ޤާނޫނަށް ޢަމަލުކުރަން ފަށާނީ މިއަދުން ފެށިގެން 6 މަސްދުވަސް ހަމަވާ ތާރީޚުގައެވެ. އަދި ޤާނޫނުގެ ދަށުން ހަދަންޖެހޭ ގަވާއިދުތައް އެ މުއްދަތުގެ ތެރޭގައި ހަދައި، ދިވެހިސަރުކާރުގެ ގެޒެޓުގައި ޝާއިޢުކުރަންވާނެއެވެ.