އިސްމާއިލް ހަބީބު އެޗްއާރުސީއެމްގެ މެންބަރުކަމަށް އައްޔަންކުރައްވައިފި

އިލެކްޝަންސް ކޮމިޝަންގެ ކުރީގެ ނައިބު ރައީސް އިސްމާއިލް ހަބީބު، ހިއުމަން ރައިޓްސް ކޮމިޝަން (އެޗްއާރުސީއެމް)ގެ ހުސްވެފައިވާ މެންބަރުކަމަށް މިއަދު އައްޔަންކޮށްފި އެވެ.

ރައީސް ޑރ. މުޙައްމަދު މުޢިއްޒު، ހަބީބު އެ މަޤާމަށް އައްޔަންކުރެއްވީ މިއަދު ރައީސް އޮފީހުގައި ބޭއްވި ޚާއްޞަ ރަސްމިއްޔާތެއްގައެވެ. މި ރަސްމިއްޔާތުގައި ހަބީބަށް މަޤާމުގެ ހުވާ ލައިދެއްވީ ސުޕްރީމް ކޯޓުގެ ފަނޑިޔާރު އަލީ ރަޝީދު ޙުސައިނެވެ.

އެޗްއާރުސީއެމްއަށް ހަބީބު އައްޔަންކުރަން ރައްޔިތުންގެ މަޖިލީހުން ރުހުން ދީފައިވަނީ މިދިޔަ ޖުލައި 31 ވަނަ ދުވަހުއެވެ. މަޖިލީހުގެ 74 މެންބަރުންގެ ތާއީދާއެކު ހަބީބަށް ރުހުން ލިބުނެވެ. ނަމަވެސް އެމްޑީޕީގެ ތިން މެންބަރުން ވަނީ ނުފެންނަ ކަމަށް ވޯޓު ދެއްވާފައެވެ.

އެޗްއާރުސީއެމްގެ މެންބަރުކަން ހުސްވެފައިވަނީ، ކުރިން އެ ކޮމިޝަންގެ ނައިބު ރައީސްގެ މަޤާމުގައި ހުންނެވި ޑރ. އަޙްމަދު އަދުހަމް ޢަބްދުﷲ މިދިޔަ އޮކްޓޯބަރު މަހު އެ މަޤާމުން އިސްތިއުފާ ދެއްވުމާ ގުޅިގެންނެވެ.

ހަބީބަކީ އިލެކްޝަންސް ކޮމިޝަންގެ މެންބަރުކަން 2014 އިން ފެށިގެން ދެ ދައުރު އަދާކުރެއްވި ބޭފުޅެކެވެ. އޭނާ އެ ކޮމިޝަނުން ވަކިވެވަޑައިގެންނެވީ މިދިޔަ މާރިޗު މަހުގެ ތެރޭގައެވެ. ހަބީބު ވަނީ ވިލާ ކޮލެޖުން ޤާނޫނީ ދާއިރާއިން ޑިގްރީ ހާސިލުކުރައްވާ، ޤައުމީ ޔުނިވަރސިޓީއިން ދިވެހި ބަހުން މާސްޓަރސް ޑިގްރީ ހާސިލުކުރައްވާފައެވެ.

މިހާރު އެޗްއާރުސީއެމްގައި ތިއްބެވި އެހެން މެންބަރުންނަކީ ކޮމިޝަންގެ ރައީސް މަރިޔަމް މުނާ، މުއުމިނާ ވަޙީދު، އާމިނަތު ޝިފާޢަތު ޢަބްދުއްރައްޒާޤު އަދި ސަމާޙު އަޙްމަދު ނަޖީބެވެ.