ކޯރަމް ހަމަނުވެގެން މިއަދުގެ މަޖިލިސް ޖަލްސާ ނުފެށިފައި

ރައްޔިތުންގެ މަޖިލީހުގެ މިއަދުގެ ޖަލްސާގެ ކޯރަމް ހަމަނުވެގެން ޖަލްސާ ބާއްވަން ތާވަލު ކުރި ގަޑިއަށް ނުފެށުނެވެ.

ރައްޔިތުންގެ މަޖިލީހު ޖައްސާ ފެށުމަށް ކަނޑައަޅާފައިވާ ގަޑިއަކީ ހެނދުނު 9:00 އެކެވެ. ނަމަވެސް މިއަދު ޖަލްސާ އެ ވަގުތަށް ފެށިފައެއް ނުވެއެވެ.

މަޖިލީހުގެ ރިޔާސަތުގައި އިންނެވި މަޖިލީހުގެ ރައީސް މުހައްމަދު އަސްލަމް ވިދާޅުވީ މިއަދުގެ ޖަލްސާ ނުފެށި ލަސްވަނީ ކޯރަމް ހަމަނުވާތީ ކަމަށެވެ. 10 ޖަހާއިރު ކޯރަމް ހަމަވޭތޯ ބައްލަވާނެ ކަމަށް އަސްލަމް ވިދާޅުވިއެވެ.

އަސްލަމް ވިދާޅުވީ ކޯރަމް ހަމަނުވެގެން ޖަލްސާ ނުފެށިފައިވާއިރު ބައެއް މެންބަރު ބޭރުގައި ތިއްބެވި ކަމަށް މައުލޫމާތު ލިބިވަޑައިގެންފައިވާ ކަމަށެވެ.

މިއަދު ހެނދުނު 10:00 ޖަހާއިރު ކޯރަމް ހަމަވޭތޯ ބެލުމަށް ފަހު ކޯރަމް ހަމަނުވާނަމަ ޖަލްސާ ނިންމާލައްވާނެ ކަމަށް އަސްލަމް ވިދާޅުވިއެވެ.

މިހާރު ހިނގަމުންދާ މަޖިލީހުގެ ފަސް އަހަރުގެ ދައުރު ނިމޭނީ މެއި 15ގައެވެ. މަޖިލީހުން އެހެން ގޮތަކަށް ކަނޑަނާޅާ ހިނދަކު މިދައުރުގެ އެންމެ ފަހުގެ ޖަލްސާ ބޭއްވުމަށް ހަމަޖެހިފައިވަނީ މެއި މަހުގެ 13 ވަނަ ދުހަވު ކަމަށް މަޖިލީހުގެ ރައީސް މުހައްމަދު އަސްލަމް ވިދާޅުވެފައިވެއެވެ.

ވިހި ވަނަ ރައްޔިތުންގެ މަޖިލީހަށް މެމްބަރުން އިންތިހާބުކޮށްފައިވާއިރު، އެ މެމްބަރުން ހުވާ ކުރުން އޮންނާނީ މެއި މަހުގެ 28 ވަނަ ދުވަހުއެވެ.