އެންމެ ގިނައިން އެކްސިޑެންޓުތައް ހިނގާ މަގުތަކުގައި 24 ގަޑިއިރު ފުލުހުން ފޯރިމަރަން ފަށައިފި

އެކްސިޑެންޓްތައް ހުއްޓުވުމަށް ޕޮލިހުން މަގުތަކަށް / ފޮޓޯ:ޕޮލިސް

މާލެ އާއި ހުޅުމާލޭގައި އެންމެ ގިނައިން އެކްސިޑެންޓުތައް ހިނގާ މަގުތަކުގައި 24 ގަޑިއިރު ފުލުހުން ފޯރިމަރަން ފަށައިފިއެވެ.

މިއީ މިފަހަކަށް އައިސް މާލެ އާއި ހުޅުމާލޭގައި ހިނގާ ނުރައްކާތެރި އެކްސިޑެންޓުތައް އިތުރުވަމުން ދިއުމާ ގުޅިގެން، އެކަން ހުއްޓުވުމަށް އެޅި ފިޔަވަޅެއްކަމަށް ޕޮލިސް ކޮމިޝަނަރު އަލީ ޝުޖާއު ވިދާޅުވިއެވެ.

މިދިޔަ ބުރާސްފަތި ދުވަހުގެ ރޭ އާއި ހުކުރު ދުވަހުގެ ރޭ ހިނގި ދެ އެކްސިޑެންޓެއްގައި ދެ ޒުވާނަކު ނިޔާވުމާ ގުޅިގެން، މި ފިޔަވަޅު އަޅަން ނިންމާފައިވާ ކަމަށް ޝުޖާއު ވިދާޅުވި އެވެ. އެންމެ ގިނައިން އެކްސިޑެންޓުތައް ހިނގާ މަގުތަކުގެ ތެރޭގައި ހުޅުމާލޭ ނިރޮޅުމަގާއި، ހުޅުމާލޭ ފޭސް ދޭކަށް ދާ ހައިވޭ އަދި ބްރިޖު ހައިވޭ ހިމެނެ އެވެ.

ޝުޖާއު ވިދާޅުވި ގޮތުގައި ހުޅުމާލޭ ދެވަނަ ފިޔަވަހީގައި އެންމެ ނުރައްކާތެރި އެކްސިޑެންޓުތައް ހިނގަނީ އެ ސަރަހައްދުގެ މަގުތަކުގައި ކެމެރާ ހަރުކޮށްފައި ނެތުމުންނެވެ. އެހެންކަމުން، އެ މަގުތަކުގައި ފުލުހުން ބޭތިއްބުމުން، ބާރަށް ދުއްވާ އުޅަނދުތައް ދެނެގަނެވި، ފިޔަވަޅު އެޅޭނެ ކަމަށް އޭނާ ވިދާޅުވި އެވެ.

މީގެ އިތުރުން، ހަފުތާ ބަންދު ދުވަސްތަކުގައި ހައިވޭތަކާއި މަގުތަކުގައި ވެހިކަލް ޗެކް ޕޮއިންޓުތައް ޤާއިމުކުރާނެ ކަމަށް ވެސް ކޮމިޝަނަރު ވިދާޅުވި އެވެ. އަދި މި މައްސަލަތަކަށް ހައްލެއް ގެނެވޭނީ ހުރިހާ ފަރާތްތަކުން ވެސް ގަވާއިދަށް ހުރުމަތްތެރިކޮށް ހިތުމުން ކަމަށް އޭނާ ފާހަގަކުރެއްވި އެވެ.

ފުލުހުން