ސްޓޭޓް މިނިސްޓަރު ޔޫސުފް އަބްދުލްގަފޫރު މަގާމުން ވަކިކޮށްފި

ހޯމްލޭންޑް ސެކިއުރިޓީ އެންޑް ޓެކްނޮލޮޖީގެ ސްޓޭޓް މިނިސްޓަރު ޔޫސުފް އަބްދުލްގަފޫރު މަގާމުން ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު މިއަދު ވަކިކޮށްފިއެވެ.

ރައީސް އޮފީހުގެ ތަރުޖަމާނު ހީނާ ވަލީދު ވިދާޅުވި ގޮތުގައި، ޔޫސުފް މަގާމުން ވަކިކޮށްފައިވަނީ ގާނޫނުއަސާސީގެ 115 ވަނަ މާއްދާއިން ރައީސުލްޖުމްހޫރިއްޔާއަށް ލިބިގެންވާ ބާރުގެ ދަށުން ނެވެ. ނަމަވެސް، އޭނާ ވަކިކުރި ސީދާ ސަބަބެއް ރައީސް އޮފީހުން ހާމަކޮށްފައެއް ނުވެއެވެ.

ޔޫސުފް އަބްދުލްގަފޫރު މަގާމުން ވަކިކުރުމާ ގުޅިގެން، ރައީސް އޮފީހުގެ ވެބްސައިޓުން ފެންނަ ސްޓޭޓް މިނިސްޓަރުންގެ ލިސްޓުން އޭނާގެ ނަމާއި ފޮޓޯ ވަނީ އުނިކޮށްފައެވެ. މިހާރު އެ މިނިސްޓްރީގައި ތިއްބެވީ 3 ސްޓޭޓް މިނިސްޓަރުންނާއި 13 ޑެޕިއުޓީ މިނިސްޓަރުންނެވެ.

ރައީސް މުޙައްމަދު މުޢިއްޒުގެ ވަޢުދަކީ ސިޔާސީ މަޤާމުތަކުގެ އަދަދު 700 ގައި ހިފެހެއްޓުން ކަމުގައި ވިޔަސް، އެ އަދަދު ވަނީ އެއަށްވުރެ މައްޗަށް އަރާފައެވެ. މިދިޔަ އޭޕްރީލް މަހު މިނިސްޓްރީން ހިއްސާކުރި މަޢުލޫމާތުތަކުން އެނގޭ ގޮތުގައި، އެ މިނިސްޓްރީގައި 43 ސިޔާސީ ބޭފުޅުން ތިއްބެވިއެވެ.

ޚަރަދު ކުޑަކުރުމަށް ސަރުކާރުން އަޅަން ނިންމައި އިޢުލާންކުރި ފިޔަވަޅުތަކުގެ ތެރޭގައި ސިޔާސީ މުވައްޒަފުން މަދުކުރުން ވެސް ހިމެ ހިމެނެއެވެ. މި ފިޔަވަޅުތަކުގެ ދަށުން ސިޔާސީ މަޤާމުތައް މަދުކުރުމަށް މަސައްކަތްކުރަމުންދާކަން ފާހަގަކުރެވެއެވެ.