ދަރުބާރުގޭ ކައިރިން ހިނގި އެކްސިޑެންޓުގައި އަނިޔާވި ޒުވާނާ ނިޔާވެއްޖެ

މާލޭގެ ދަރުބާރުގޭ ކައިރިން މިދިޔަ ބުދަ ދުވަހުގެ ރޭ ދަންވަރު ހިނގި އެކްސިޑެންޓެއްގައި އަނިޔާވި 21 އަހަރުގެ ޒުވާނާ، އައިޖީއެމްއެޗްގައި ފަރުވާ ދެމުންދަނިކޮށް ރޭ ނިޔާވެއްޖެ އެވެ.

މި އެކްސިޑެންޓް ހިނގީ ބޮޑުތަކުރުފާނު މަގާއި ކޮއިމަލާ ހިނގުން ގުޅޭ ކަންމަތީގައި، ކާރަކާއި ސައިކަލެއް ޖެހިގެން އެރޭ ދަންވަރު 12:50 ހާއިރު އެވެ. އެކްސިޑެންޓަށް ފަހު، އައިޖީއެމްއެޗްގައި ފަރުވާ ދެމުން ދިޔައީ ސައިކަލް ދުއްވަން އިން މުހައްމަދު ލީވާންއަށެވ

މި އެކްސިޑެންޓުގައި ލީވާން ދުއްވަން އިން ސައިކަލަށް ވަރަށް ބޮޑަށް ގެއްލުންވެފައިވާކަމަށް ވެ އެވެ. ސައިކަލު ގޮސް ޖެހިފައި ވަނީ ކާރުގެ ވާތްފަރާތު ކުރީ ދޮރުގަ އެވެ.

މިއީ މިދިޔަ ދެ ދުވަސް ތެރޭ އެކްސިޑެންޓު ވެގެން ނިޔާވި ދެވަނަ ޒުވާނާ އެވެ. މިގޮތުން، މިދިޔަ ހުކުރު ދުރު ދުވަހު ހުޅުމާލޭގައި ސްޕޯޓް ކާރަކާއި ސައިކަލެއް ޖެހި ހިނގި އެކްސިޑެންޓެއްގައި އުމުރުން 23 އަހަރުގެ ހަސަން ސަމާހް ވަނީ ނިޔާވެފައެވެ. އެ އެކްސިޑެންޓާ ގުޅިގެން، ކާރު ދުއްވި 26 އަހަރުގެ މުހައްމަދު ވިސާމް ވަނީ ހައްޔަރުކޮށް ޝަރީއަތް ނިމެންދެން ބަންދުކޮށްފައެވެ. އޭނާގެ އަތުގައި ކާރު ދުއްވުމުގެ ލައިސަންސެއް ނެތްކަން ވެސް ފާހަގަކުރެވެ އެވެ.

މި ފަދަ އެކްސިޑެންޓުތައް އިތުރުވަމުން ދިއުމާ ގުޅިގެން، ސަރުކާރުން މިހާރު ވަނީ އެކްސިޑެންޓުތައް މަދުކުރުމަށްޓަކައި ހަރުކަށި ފިޔަވަޅުތަކެއް އެޅުމަށް ނިންމާފައެވެ. މި ފިޔަވަޅުތަކުގެ ތަފްސީލު އަދި ހާމަކޮށްފައި ނުވި ނަމަވެސް، މަގުމަތީގެ ރައްކާތެރިކަން އިތުރުކުރުމަށް އަވަސް ފިޔަވަޅުތަކެއް އެޅޭނެ ކަމަށް ބެލެވެއެވެ.