ފުލުހުން ނައްތާލި އުޅަނދުތަކުގެ ވީޑިއޯއާ ގުޅޭ ޙަޤީޤަތް ހާމަކޮށްފި

ފުލުހުން ވެހިކަލްތައް ނައްތާލުމުގެ ތެރެއިން

ސޯޝަލް މީޑިއާގައި މިހާރު ދައުރުވަމުންދާ ވީޑިއޯއެއްގައި ފެންނަނީ އުސޫލާއި އެއްގޮތަށް ނައްތާލާފައިވާ އުޅަނދުތަކެއް ކަމަށް ދިވެހި ފުލުހުންގެ ޚިދުމަތުން މިއަދު ބުނެފިއެވެ.

މި ވީޑިއޯގައި ފެންނަނީ މޭރީބްރައުން ކައިރީގައި ހުންނަ ޓޯވް ޔާޑުގައި ފުލުހުން ސައިކަލުތަކެއް ޓްރަކަކުން ވައްޓާލާ މަންޒަރެވެ. މިކަމާ ގުޅިގެން ގިނަ ބަޔަކު ވަނީ ކަންބޮޑުވުން ފާޅުކޮށްފައެވެ.

ފުލުހުން ނެރުނު ބަޔާނެއްގައި ބުނެފައިވަނީ މި ވީޑިއޯގައި ފެންނަނީ އޮންނަ އުސޫލުގެ ތެރެއިން މިދިޔަ ހުކުރު ދުވަހު ނައްތާލާފައިވާ އުޅަނދުތަކެއް ކަމަށެވެ. މި އުޅަނދުތަކަކީ ނައްތާލުމަށް ހަމަޖެހިފައިވާ އުޅަނދުތަކެއްކަމަށާއި، މިހާރު މި އުޅަނދުތައް އުސޫލުގެ ތެރެއިން ނައްތާލެވިފައިވާ ކަމަށް ފުލުހުން ބުނެފައިވެއެވެ.

ފުލުހުން ހާމަކުރި މަޢުލޫމާތުގައިވާ ގޮތުން، ނައްތާލާފައިވަނީ 247 ދެ ފުރޮޅުލީ އުޅަނދާއި، 29 ހަތަރު ފުރޮޅުލީ އުޅަނދާއި، 223 ބައިސިކަލާއި، އެއް އެމްބިއުލާންސެވެ. މި އުޅަނދުތަކަކީ އެކި ދުވަސްމަތިން ހުޅުމާލެއާއި މާލެއިން ޓޯ ކޮށްފައިވާ އުޅަނދުތަކެއްކަމަށް ފުލުހުން ބުނެފައިވެއެވެ.

މި ވީޑިއޯއާ ގުޅިގެން ސޯޝަލް މީޑިއާގައި ފުލުހުންގެ މައްޗަށް އެކި ތުހުމަތުތައް ކުރަމުންދާއިރު، ދައުލަތުގެ މުއައްސަސާތަކުގެ މައްޗަށް ފުލުހުންކުރާ އިތުބާރާއި، މުޖްތަމަޢުގެ އެއްބައިވަންތަކަން ގެއްލޭގޮތަށް މިފަދަ މަޢުލޫމާތު ނުފެތުރުމަށް ފުލުހުން ވަނީ އިލްތިމާސްކޮށްފައެވެ.

ފުލުހުން