ކަޅު ބާޒާރުގައި ޑޮލަރުގެ ވިއްކާ ބިދޭސީންތަކެއް އަތުލައިގެންފި

ކަޅު ބާޒާރުގައި ޑޮލަރުގެ ވިޔަފާރި ކުރަމުންދާ ބިދޭސީންތަކެއް މޯލްޑިވްސް އިމިގްރޭޝަނުން މިއަދު އަތުލައިގެންފިއެވެ.

ފުލުހުންނާއި އިމިގްރޭޝަނުން ގުޅިގެން ހިންގި އޮޕަރޭޝަނެއްގައި ކަޅު ބާޒާރުގައި ޑޮލަރު ވިއްކުމުގެ ބޮޑު ވިޔަފާރިއެއް ހިންގަމުންދާ މައްސަލައިގައި ބިދޭސީ ފަސް މީހަކު ވަނީ ހައްޔަރުކޮށްފައެވެ. އެމީހުން ހައްޔަރުކޮށްފައިވަނީ ގިނަ އަދަދެއްގެ ފައިސާއާއެކުގައެވެ.

އިމިގްރޭޝަނުން ބުނީ ، އެ މީހުންގެ ޓާސްކް ފޯހުގެ އިންޓެލިޖެންސަށް ލިބުނު މައުލޫމާތަކާ ގުޅިގެން މިއަދު ހިންގި ހާއްސަ އޮޕަރޭޝަންގައި އަތުލައިގަތް ބިދޭސީންގެ އަތުން އެތައް ލައްކަ ރުފިޔާއެއް ފެނިފައިވާ ކަމަށެވެ. އެ މީހުންގެ އަތުން ފައިސާގެ އިތުރުން ގިނަ އަދަދެއްގެ ޑެބިޓް އަދި ކްރެޑިޓް ކާޑު ވެސް ފެނިފައިވާކަމަށެވެ.

މި އޮޕަރޭޝަންގައި އަތުލައިގަތް ފައިސާގެ ސީދާ އަދަދެއް އަދި ހާމަކޮށްފައެއް ނުވެއެވެ.

އިމިގްރޭޝަނުން އާންމުކުރި ފޮޓޯތަކުން ފެންނަ ގޮތުގައި އަތުލައިގަތް ފައިސާގެ ތެރެއިން ގިނަ އަދަދެއްގެ އެމެރިކާ ޑޮލަރާއި އެހެނިހެން ބޭރު ފައިސާގެ އިތުރުން ދިވެހި ރުފިއްޔާ ނޫޓުތައް ގިނަ އަދަދަކަށް ހުއްޓެވެ.

އިމިގްރޭޝަނުން ބުނީ އެ މައްސަލަ އިތުރަށް ތަހުގީގު ކުރަމުން އަންނަ ކަމަށާއި އިތުރު މައުލޫމާތު ތައް ހާމަކުރާނެ ކަމަށެވެ.