އަޒަރުބައިޖާން އެއާލައިންސް އިން ރާއްޖެއަށް ސީދާ ދަތުރުތައް ފަށަނީ

މިއަހަރުގެ ފިނި މޫސުމާ ދިމާކޮށް އަޒަރުބައިޖާން އެއާލައިންސް އިން ރާއްޖެއަށް ސީދާ ދަތުރުތައް ބާއްވާނެ ކަމަށް އިއުލާނުކޮށްފިއެވެ.

އެ އެއާލައިނުން އިއުލާނުކޮށްފައިވާ ގޮތުގައި، އަންނަ ނޮވެމްބަރު 8 އިން ފެށިގެން އަޒަރުބައިޖާން އެއާލައިންސް އިން ވެލާނާ އިންޓަނޭޝަނަލް އެއާޕޯޓަށް ސީދާ ދަތުރުތައް ފަށާނެއެވެ.

މިއީ އަޒަރުބައިޖާން އެއާލައިންސް އިން ރާއްޖެއަށް ދަތުރުތައް ބާއްވާ ފުރަތަމަ ފަހަރެވެ.

މި ދަތުރުތައް ބާއްވާނީ ހަފްތާއަކު ދެ ދުވަހުއެވެ. އަޒަރުބައިޖާނުން މާލެއަށް ދަތުރުތައް އޮންނާނީ ހުކުރު އަދި އާދިއްތަ ދުވަހުއެވެ. އަދި މާލެއިން އަޒަރުބައިޖާނަށް ދަތުރުތައް އޮންނާނީ ހޮނިހިރު އަދި ހޯމަ ދުވަހުއެވެ. ގާތްގަނޑަކަށް ހަ ގަޑިއިރު ހޭދަވާނެ މި ދަތުރުތައް ކުރާނީ ބޮއިން-787 މަރުކާގެ ބޯޓުތަކުގައެވެ.

މި ދަތުރުތައް ފެށުމުން، ހުޅަނގު އޭޝިއާ ސަރަހައްދުގައި އޮންނަ މި ގައުމަށް ދަތުރުކުރަން ބޭނުންވާ ދިވެހިންނަށް ވެސް ފަސޭހަވެގެންދާނެއެވެ. ފާހަގަކޮށްލެވޭ ކަމަކީ، ކޮންމެ އަހަރެއްގެ ވެސް ފިނި މޫސުމާ ދިމާކޮށް ގިނަ މަންޒިލުތަކުން ރާއްޖެއަށް ސީދާ ދަތުރުތައް ބާއްވަމުން އަންނަ ކަމެވެ. އަޒަރުބައިޖާން އެއާލައިންސްގެ މި ދަތުރުތަކަކީ ވެސް މި މޫސުމުގައި ރާއްޖެއަށް އިތުރުވާ ދަތުރުތަކުގެ ތެރެއިން ދަތުރުތަކެކެވެ.