ބަންކަރިންގެ ޚިދުމަތް ފެށުމަށް އެސްޓީއޯއިން ގެންނަ ދެ ބޯޓު ދެ ދުވަސްފަހުން ރާއްޖެ އަންނަނީ

ބަންކަރިން ޚިދުމަތަށްދަނީ ފަހުގެ ތައްޔާރީތައްވަމުން : ފޮޓޯ:އެމްޕީއެލް :

ރާއްޖޭގައި ބަންކަރިންގެ ޚިދުމަތް ފެށުމަށް އެސްޓީއޯއިން ގެންނަ ދެ ބޯޓު މިމަހުގެ 8 ވަނަ ދުވަހު ރާއްޖެ އަންނާނެކަމަށް އެ ކުންފުނިން ބުނެފިއެވެ.

މި ދެ ބޯޓު މާލެއަށް އައުމަށްފަހު، 11 ނުވަތަ 12 ވަނަ ދުވަހު ރާއްޖޭގެ އުތުރަށް ގެންދެވޭނެއެވެ.

ކޮންމެ ބޯޓެއްގައި ގާތްގަނޑަކަށް 4000 ޓަނުގެ ފިއުލް އެޅޭނެ ކަމަށާއި، ބަންކަރިންގެ ޚިދުމަތް އެންމެ ފުރަތަމަ ފަށާނީ އިހަވަންދިއްޕޮޅުގައި ކަމަށް އެސްޓީއޯއިން ހާމަކޮށްފައިވެއެވެ.

ބަންކަރިންގެ ޚިދުމަތާ ގުޅޭގޮތުން އެމްޕީއެލްގެ ސީއީއޯ މުޙައްމަދު ވަޖީހް އިބްރާހީމް ވިދާޅުވެފައިވަނީ، މި ޚިދުމަތް ފޯރުކޮށްދިނުމަށްޓަކައި ޚާއްސަ އިމާރާތެއް ހއ. އުލިގަމުގައި ހުޅުވުމަށް ތައްޔާރުވެފައިވާ ކަމަށާއި، މިމަހުގެ 12 ވަނަ ދުވަހުގެ ކުރިން އެ ޢިމާރާތް ހުޅުވޭނެ ކަމަށެވެ.

އެސްޓީއޯއިން ބަންކަރިންގެ ޚިދުމަތް ފަށާ ދުވަހުން ފެށިގެން، އެމްޕީއެލްއިން ބޯޓުފަހަރަށް ބޭނުންވާ އެހެނިހެން ޚިދުމަތްތައް ފޯރުކޮށްދޭން ތައްޔާރަށް ތިބޭނެ ކަމަށްވެސް ވަޖީހު ވިދާޅުވިއެވެ.

ރާއްޖޭގައި ބަންކަރިންގެ ޚިދުމަތް ފެށުމުން، ރާއްޖޭގެ ޖީޑީޕީއަށް 400 މިލިއަން ޑޮލަރު އިތުރުވެ، 6 ބިލިއަން ދިވެހި ރުފިޔާގެ އައު ސިނާއަތެއް އުފެދޭނެ ކަމަށް ސަރުކާރުން ލަފާކުރެއެވެ.

އެމްޕީއެލް އެސްޓީއޯ