އަލަށް ފަށާ ޚިދުމަތްތަކާއެކު ވެމްކޯ ތަފާތުވާނެ، ނަތީޖާ ނެރޭނީ މުވައްޒަފުން ގުޅިގެން - މުޖުތަބާ

ވެމްކޯގެ ހިދުމަތްތައް ފުޅާކުރުމަށް އަލަށް ފެށުނު ހިދުމަތްތަކާއި އެކު ކުންފުނި މުޅިން އާ ހަރުފަތަކަށް ގެންދެވޭނެ ކަމަށް މެނޭޖިންގ ޑިރެކްޓަރު މުޖުތަބާ ޖަލީލް ވިދާޅުވެއްޖެ އެވެ.

މުޖުތަބާ މިފަދައިން ވިދާޅުވީ ރޭ ދައުލަތުގެ މީޑިއާއިން ގެނެސްދިން ޕްރޮގްރާމެއްގައި ވާހަކަފުޅު ދައްކަވަމުންނެވެ.

އެގޮތުން ކުންފުނީގެ ހަރަދު ކުޑަކުރުމަށް މުވައްޒަފުން ވަކިކުރުމުގެ ބަދަލުގައި ހުރިހާ މުވައްޒަފުންވެސް މަސައްކަތްތަކުގައި މިހާރު ފުރިހަމައަށް ޝާމިލުކުރަމުންދާކަން މުޖުތަބާ ފާހަގަކުރެއްވި އެވެ. އަލަށް ފެށުނު ހިދުމަތްތަކާއި އެކު ކުންފުނީގެ މުވައްޒަފުން އައިޑަލްކޮށް ބޭތިއްބުމުގެ ބަދަލުގައި ހުރިހާ މުވައްޒަފުންވެސް ޔޫޓިލައިޒް ވެގެންގޮސްފައިވާ ކަމަށާއި މިކަމުގެ ސަބަބުން ކުންފުންޏަށް ވަންނަ އާމްދަނީން ކުންފުނީގެ ހަރަދުތައް ދެކޮޅު ޖެއްސިގެންދާނެ ކަން މުޖުތަބާ ފާހަގަކުރެއްވި އެވެ.

މުޖުތަބާ ވިދާޅުވީ އައު ސަރުކާރާއި އެކު ކުންފުންޏާއި ހަވާލުވި އިރު ކުންފުނީގެ ވަރަށް ގިނަ މުވައްޒަފުންތަކެއް ތިބި ކަމަށާއި މުސާރައަށް ކުރާ ހަރަދުވެސް ހުރީ ވަރަށް ބޮޑުކޮށް ކަމަށެވެ. ނަމަވެސް ކުންފުނީގެ ހިދުމަތްތައް ފުޅާކޮށް އާމްދަނީ އިތުރުކުރުމަށް ދާދި ފަހުން ފެށުނު ފޮޅާ ސާފު ކުރުމުގެ ހިދުމަތާއި ރިސޯޓުތަކުން ކުނި ނެގުމުގެ ހިދުމަތާއި އެކު ކުންފުންޏަށް ވަރަށް ގިނަ ފައިދާތަކެއް ލިބިގެންދާނެ ކަމަށް މުޖުތަބާ ވިދާޅުވިއެވެ.