ދިވެހި ގައުމިއްޔަތުގެ އިސްވަރު ކޮލެޖް ރައީސުލްޖުމުހޫރިއްޔާ އިފްތިތާހުކޮށްދެއްވައިފި

ގައުމިއްޔަތުގެ ދިރާސާތައް ހެދުމަށް ސަރުކާރުން އުފައްދަން ނިންމި ހާއްސަ ކޮލެޖް، "ދިވެހި ގައުމިއްޔަތުގެ އިސްވަރު" ރައީސުލްޖުމުހޫރިއްޔާ ޑރ. މުހައްމަދު މުއިއްޒު މިއަދު އިފްތިތާހުކޮށްދެއްވައިފި އެވެ.

މި ކޮލެޖް އިފްތިތާހުކޮށްދެއްވީ ގައުމީ ދުވަހުގެ މުނާސަބަތުގައި ދަރުބާރުގޭގައި ބޭއްވުނު ރަސްމީ ހަފްލާގައެވެ.

ގައުމިއްޔަތު ދިރުވުމަށްޓަކައި ތިން އިދާރާއެއް އުފެއްދެވުމަށް ރައީސް މުއިއްޒު ނިންމަވާފައި ވަނީ މިދިޔަ ޑިސެމްބަރު މަހުއެވެ. އޭގެ ތެރޭގައި މި ގައުމިއްޔަތަށް ހާއްސަ ކޮލެޖް ހިމެނެއެވެ. މިނިސްޓަރު އާދަމް ނަސީރު މީގެ ކުރިން ވިދާޅުވެފައިވާ ގޮތުގައި، މިއީ ކިޔެވުމަށް ހާއްސަ ކޮލެޖެއް ނޫނެވެ. މިއީ ރާއްޖޭގެ ސަގާފަތާ ގުޅޭ އެކި ތަފާތު ދިރާސާތައް ކުރުމަށް ހާއްސަ ކޮލެޖެކެވެ.

އިފްތިތާހީ ރަސްމިއްޔާތުގައި ދެއްކެވި ޕްރެޒެންޓޭޝަނުގައި ބުނެފައިވަނީ މި ކޮލެޖަކީ ރައީސް މުއިއްޒު އެކަށައަޅުއްވާފައިވާ ގައުމިއްޔަތު އިޔާދަކުރެއްވުމުގެ ގައުމީ ނިޒާމްގެ މުހިންމު އެއް ގުނަވަން ކަމަށެވެ.

"އިސްވަރު" އެކުލެވިގެންވަނީ މައިގަނޑު ފަސް ދާއިރާއެއްގެ މައްޗަށެވެ. އެއީ ދިވެހި ބަހުގެ ވަރު، ދިވެހި ތާރީހުގެ ވަރު، ދިވެހި ތަރިކައިގެ ވަރު، ދިވެހި ސުމޭކުގެ ވަރު އަދި ދިވެހި ފަންނުގެ ވަރެވެ. މި ރަސްމިއްޔާތުގައި މި ފަސް ދާއިރާއަށް އިސް ބޭފުޅުން އައްޔަންކޮށްފައިވެ އެވެ.

ކޮލެޖްގެ ކައުންސިލްގެ ފަސް ބޭފުޅުންގެ ގޮތުގައި އައްޔަންކޮށްފައިވަނީ މަރްޔަމް ތައުފީގާ (ދިވެހި ބަހުގެ އިސްވާރު)، ކަށީމާ އަހްމަދު ޝާކިރު (ދިވެހި ތާރީހުގެ އިސްވާރު)، ހަސަން ޒަރީރު (ދިވެހި ތަރިކައިގެ އިސްވާރު)، މުހައްމަދު އަބްދުލްގާދިރު (ދިވެހި ސުމޭކުގެ އިސްވާރު) އަދި މަރްޔަމް އިޝާ އަޒީޒް (ދިވެހި ފަންނުގެ އިސްވާރު) އެވެ.

މި ޖަލްސާގައި ވާހަކަ ދެއްކެވި ދިވެހި ބަހާއި ތަރިކައާ ގުޅޭ މިނިސްޓަރު އާދަމް ނަސީރު އިބްރާހިމް ވިދާޅުވި ގޮތުގައި 'ވަރު' މި ލަފްޒު ނެގިފައި ވަނީ، ގައުމީ ދުވަހުގެ ބަތަލު ރާއްޖެ މިނިވަން ކުރުމަށް ފަހު، ކަންކަން ބެލެހެއްޓުމަށް އުފެއްދި ގްރޫޕްތަކަށް ކިޔާ ނަމުންނެވެ. މި ކޮލެޖް އުފެއްދުމަކީ ދިވެހި ގައުމިއްޔަތު ދިރުވައި އާލާކުރުމަށް އެޅޭ މުހިންމު ފިޔަވަޅެއް ކަމުގައި ބެލެވެއެވެ.