އެމްއެމްއޭއަށް ފަސް މެނޭޖިން ޑިރެކްޓަރުން ހޯދުމަށް އަލުން އިޢުލާނުކޮށްފި

އެމްއެމްއޭ

މޯލްޑިވްސް މަނިޓަރީ އޮތޯރިޓީ (އެމްއެމްއޭ) އަށް ފަސް މެނޭޖިން ޑިރެކްޓަރުން ހޯދުމަށް އަނެއްކާވެސް އިޢުލާންކޮށްފިއެވެ.

މިއީ މިދިޔަ މަހުގެ 8 ވަނަ ދުވަހު ކުރި އިޢުލާނަށް އެކަށީގެންވާ އަދަދަކަށް ޝަރުތު ހަމަވާ ފަރާތްތަކުގެ އެޕްލިކޭޝަން ލިބިފައިނުވާތީ، އަލުން ކުރި އިޢުލާނެކެވެ.

އެމްއެމްއޭއިން މިއަދު ކުރި އިޢުލާނުގައި ބުނެފައިވަނީ، ކުރީގެ އިޢުލާން ބާޠިލުކޮށް، ޓަރމްސް އޮފް ރިފަރެންސްއަށް ބަދަލުގެނެސް އަލުން މި ފުރުޞަތު ހުޅުވާލާފައިވާ ކަމަށެވެ.

މި މަޤާމުތަކަށް ބޭނުންވަނީ ހުނަރުވެރި، ޤާބިލު އަދި އިޚްލާޞްތެރިކަމާއި ތެދުވެރިކަމާއެކު މަސައްކަތްކުރުމަށް ޝައުޤުވެރިވާ ފަރާތްތައް ކަމަށް އެމްއެމްއޭއިން ފާހަގަކޮށްފައިވެއެވެ. އަދި މި ފަސް މެނޭޖިން ޑިރެކްޓަރުންގެ މަޤާމުތަކަކީ އަންހެނުންނާއި ފިރިހެނުންނަށް ހަމަހަމަ ފުރުޞަތު އޮތް މަޤާމުތަކެއްކަން އެމްއެމްއޭއިން ކުރި އިޢުލާނުގައި ބަޔާންކޮށްފައިވެއެވެ.

އަލަށް އުފައްދާފައިވާ ދާއިރާތަކަކީ މަނިޓަރީ ޕޮލިސީ، ރިސަރޗް އެންޑް ސްޓެޓިސްޓިކްސް، ފައިނޭންޝަލް ސްޓެބިލިޓީ، ބޭންކިންގ އޮޕަރޭޝަންސް، ކޯޕޮރޭޓް ސަރވިސަސް، އަދި ފައިނޭންޝަލް ސެކްޓަރ ޑިވަލަޕްމަންޓެވެ.

މި މަގާމުތަކުގެ މުސާރައާއި އިނާޔަތުގެ ގޮތުގައި 50،000ރ. އާއި 55،000ރ. އާ ދެމެދުގެ އަދަދެއް ލިބޭނެކަމަށް އެމްއެމްއޭއިން ބުނެއެވެ.

މި މަގާމުތަކަށް ޝައުގުވެރިވާ ފަރާތްތަކުން މިމަހުގެ 17 ވަނަދުވަހުގެ 13:00ގެ ކުރިން ހުށައެޅުމަށް މަރުކަޒީ ބޭންކުން ވަނީ ހުޅުވާލާފައެވެ. މި މަގާމުގެ މުއްދަތަކީ ފަސް އަހަރުގެ ދެ ދައުރެވެ.

އެމްއެމްއޭ