ޕީސީބީން ދައުލަތުގެ ކުންފުނިތަކަށް ޚަރަދު ކުޑަކުރުމަށް އަންގައިފި

ޕްރައިވަޓައިޒޭޝަން އެންޑް ކޯޕަރަޓައިޒޭޝަން ބޯޑް (ޕީސީބީ) އިން ދައުލަތުގެ ކުންފުނިތަކަށް ޚަރަދު ކުޑަކުރުމަށް އަންގައިފިއެވެ.

މިގޮތުން ޑޮލަރުން އާމްދަނީ ލިބޭ ކުންފުނިތަކުން ޑޮލަރުން މުސާރަ ދިނުން ހުއްޓާލުމަށާއި އެހެނިހެން ޚަރަދުތައް ކުޑަކުރުމަށް އަންގާފައިވެއެވެ. ރާއްޖެއަށް ކުރިމަތިވެފައިވާ އިޤްތިޞާދީ އަދި މާލީ ހާލަތުން އަރައިގަތުމަށް މި ފިޔަވަޅުތައް އަޅަން ޖެހިފައިވާކަމަށް ޕީސީބީން ބުނެފައިވެއެވެ.

ޚަރަދު ކުޑަކުރުމަށް އަޅަން އަންގާފައިވާ ފިޔަވަޅުތަކުގެ ތެރޭގައި ދަތުރު ޚަރަދާއި މުވައްޒަފުންގެ ޚަރަދު ކުޑަކުރުން ހިމެނެއެވެ. މިގޮތުން ކޮންމެހެން ކުރަންޖެހޭ ދަތުރުތައް ފިޔަވައި އެހެން ދަތުރުތައް މަދުކުރުމަށާއި، ބޭރުގެ ފަރާތްތަކާ އޮންލައިންކޮށް ބައްދަލުކުރުމަށް އަންގާފައިވެއެވެ. އަދި ފެރީގެ ޚިދުމަތް ލިބޭ ސަރަޙައްދުތަކުގައި ފެރީ ބޭނުންކުރުމަށާއި، ދަތުރުތަކުގެ ޚަރަދު ވީހާވެސް ކުޑަކުރުމަށް އަންގާފައިވެއެވެ. މީގެއިތުރުން، 6 ގަޑިއިރަށްވުރެ ކުރު ބޭރު ދަތުރުތަކުގައި ފަސްޓް ކްލާހުން ދަތުރު ނުކުރުމަށްވެސް އަންގާފައިވެއެވެ.

މުވައްޒަފުންގެ ޚަރަދު ކުޑަކުރުމަށް، ކޮންމެހެން ބޭނުންވާ މުވައްޒަފުން ނޫނީ އިތުރު މުވައްޒަފުން ނުނެގުމަށާއި، ޕީސީބީގެ ހުއްދައާ އެކު ނޫނީ މުސާރައާއި އިނާޔަތްތަކަށް ބަދަލު ނުގެނައުމަށް އަންގާފައިވެއެވެ. އިތުރުގަޑީގެ މަސައްކަތް މަދުކުރުމަށާއި، ތަމްރީނުތަކަށް ކުންފުނީގެ އަމިއްލަ ވަސީލަތްތައް ބޭނުންކުރުމަށްވެސް އަންގާފައިވެއެވެ. އަދި ކަރުދާހުން ކުރާ މުޢާމަލާތްތައް ކުޑަކޮށް، ޑިޖިޓަލްކޮށް މުޢާމަލާތް ކުރުން އިތުރުކުރުމަށާއި ހަފްލާތަކުގެ ރިފްރެޝްމަންޓްތަކަށް ކުރާ ޚަރަދު ކުޑަކުރުމަށްވެސް އަންގާފައިވެއެވެ.

މި ފިޔަވަޅުތަކަކީ ސަރުކާރުގެ ޚަރަދުތައް ކުޑަކުރުމަށް ކުރަމުންދާ މަސައްކަތުގެ ބައެކެވެ. މިގޮތުން ބައެއް ކުންފުނިތައް އުވާލުމަށާއި އެއްކަހަލަ މަސައްކަތްކުރާ ކުންފުނިތައް އެއްކޮށްލުމަށް ވަނީ ނިންމާފައެވެ. މި އިޞްލާޙީ ފިޔަވަޅުތަކުގެ ސަބަބުން ދައުލަތުގެ ކުންފުނިތަކުގެ ހިންގުން ހަރުދަނާވެ، ޚަރަދުތައް ކުޑަވެ، ފައިދާ އިތުރުވާނެ ކަމަށް ސަރުކާރުން އުންމީދުކުރެއެވެ.