އިޒްރޭލަށް ވިއްކާ ބައެއް ހަތިޔާރުގެ ލައިސަންސް އިނގިރޭސިވިލާތުން ހިފަހައްޓައިފި

އިސްރާއިލުގެ ހަމަލާތަކާއި ދުނިޔޭގެ ގިނަ ޤައުމުތަކުން ދެކޮޅު

އިނގިރޭސިވިލާތުން އިޒްރޭލަށް ފޯރުކޮށްދޭ ބައެއް ހަތިޔާރު ބޭނުންކުރަމުންދަނީ ބައިނަލްއަޤްވާމީ ޤާނޫނުތަކާ ޚިލާފަށް ކަމަށް ބުނެ، އިނގިރޭސިވިލާތުން އިޒްރޭލަށް ބައެއް ހަތިޔާރު ވިއްކުން މެދުކަނޑާލައިފިއެވެ.

އިނގިރޭސިވިލާތުގެ ފޮރިން ސެކްރެޓަރީ ޑޭވިޑް ލެމީ ވިދާޅުވި ގޮތުގައި، އިޒްރޭލަށް ހަތިޔާރު އެކްސްޕޯޓް ކުރުމުގެ 350 ލައިސަންސްގެ ތެރެއިން 30 ލައިސަންސް ސަސްޕެންޑް ކުރާނެއެވެ. މި ފިޔަވަޅުގެ ސަބަބުން ހަނގުރާމަމަތީ މަތިންދާބޯޓާއި ހެލިކޮޕްޓަރު އަދި ޑްރޯން ފަދަ އާލާތްތަކަށް އަސަރު ކުރާނެއެވެ.

އެމްނެސްޓީ އިންޓަނޭޝަނަލް ޔޫކޭގެ ޗީފް އެގްޒެކެޓިވް ސަޗާ ދޭޝްމުކް ވިދާޅުވެފައިވަނީ މި ފިޔަވަޅުތަކަކީ ވަރަށް ހަނި އަދި ފުށުއެރުންތަކެއް ހުރި ފިޔަވަޅުތަކެއް ކަމަށެވެ. އެ ޖަމިއްޔާއިން ދަނީ ހަނގުރާމަ ހުއްޓާލުމަށާއި ގާޒާއަށް އިންސާނީ އެހީތެރިކަން ފޯރުކޮށްދިނުމުގެ ފުރުސަތު ދިނުމަށް ގޮވާލަމުންނެވެ.

ގާޒާގައި ހަމާސް ޖަމާޢަތާ ދެކޮޅަށް އިޒްރޭލުން ހަނގުރާމަ ކުރަމުންދާ ގޮތާ މެދު ނުރުހި، ހުޅަނގުގެ ސަރުކާރުތަކަށް ދަނީ ހަތިޔާރު ވިއްކުން ހުއްޓާލުމަށް ޕްރެޝަރު ބޮޑުވަމުންނެވެ.

ފޮރިން ސެކްރެޓަރީ ލެމީ ވިދާޅުވީ އެކްސްޕޯޓް ލައިސަންސްތައް މުރާޖަޢާ ކުރުމަކީ ސަރުކާރުގެ އަމިއްލަ ގާނޫނީ ވާޖިބެއް ކަމަށެވެ. އަދި މި ނިންމުމަކީ އިޒްރޭލުގެ ދިފާޢީ ޙައްޤުތަކަށް އަސަރުކުރާނެ ކަމެއް ނޫން ކަމަށް އޭނާ ވިދާޅުވިއެވެ.

އިސްރާއިލް ފަލަސްތީން