ދޫނިދޫ ގޮޅީގައި ދަންޖެހުމަށްފަހު އައިޖީއެމްއެޗްގައި ފަރުވާދެމުން ދަނިކޮށް އަތުހަރު މަރުވެއްޖެ

އަންހެނެއްގެ ކަރުގައި ވަޅި ޖައްސައި ރަހީނު ކުރި މައްސަލާގައި ފުލުހުންގެ ހައްޔަރުގައި ހުރި އާދަމް އަތުހަރު، ދޫނިދޫ ގޮޅީގައި ދަންޖެހުމަށްފަހު އައިޖީއެމްއެޗްގައި ފަރުވާދެމުން ދަނިކޮށް މިއަދު މަރުވެއްޖެ އެވެ.

ފުލުހުން މީޑިއާތަކަށް ފޮނުވި މެސެޖެއްގައި ބުނެފައިވަނީ މިއަދު ހަވީރު 4:08 ހާއިރު އަތުހަރު މަރުވެފައިވާ ކަމަށެވެ. އަތުހަރު އައިޖީއެމްއެޗަށް ގެންގޮސް ފަރުވާ ދޭން ފެށީ ދޫނިދޫ ގޮޅީގައި އަމިއްލައަށް މަރުވާން އުޅުމުން ކަމަށް ފުލުހުން ބުނެ އެވެ. އޭނާ އައިސީޔޫއަށް ބަދަލުކޮށްފައިވަނީ ރޭގަ އެވެ.

ދޫނިދޫގައި އަތުހަރު ދަންޖެހުނު ގޮތް ބެލުމަށް ނެޝަނަލް އިންޓެގްރިޓީ ކޮމިޝަން (އެންއައިސީ) އާއި ހިއުމަން ރައިޓްސް ކޮމިޝަން (އެޗްއާރުސީއެމް) ހަރަކާތްތެރިވަމުން އަންނަ ކަމަށް ފުލުހުން ބުނެފައިވެ އެވެ. އަދި މި އިދާރާތަކަށް ފުލުހުންގެ ފުރިހަމަ އެއްބާރުލުން ދޭނެ ކަމަށް ވެސް ފުލުހުން ބުނެފައިވެ އެވެ.

ފުލުހުން ހާމަކުރި މަޢުލޫމާތުގެ ތެރޭގައި، އަތުހަރު ދަންޖެހުނުކަން ފާހަގަކުރެވުނީ ރޭގަނޑު 7:02 ގައި ކަމަށާއި، އޭނާ ސްޓްރެޗާއަށް ލައިގެން ގޮޅިން ނެރުނީ ރޭގަނޑު 7:05 ގައި ކަމަށް ބުނެފައިވެ އެވެ. އަދި ދޫނިދޫ ކްލިނިކަށް ގެންދިޔައީ ރޭގަނޑު 7:06 ގައި ކަމަށާއި، ކުއްލި ހާލަތުގައި ލޯންޗުގައި މާލެ ގެންދިޔައީ ރޭގަނޑު 7:14 ގައި ކަމަށް ވެސް ފުލުހުން ބުނެފައިވެ އެވެ. އައިޖީއެމްއެޗްގެ އެމަޖެންސީއަށް އަތުހަރު ގެންދެވުނީ ރޭގަނޑު 7:25 ގައި ކަމަށް ފުލުހުން ބުނެފައިވެ އެވެ.

އަތުހަރު ހައްޔަރުކުރެވުނީ ބުރާސްފަތި ދުވަހުގެ ރޭ ހިނގި ހާދިސާގައި އަންހެން މީހާ ސަލާމަތްކުރަން އުޅުނު އިރު ފުލުހުން މުގުރުން އޭނާގެ ބޮލުގައި ޖެހުމުން ލިބުނު އަނިޔާތަކަށް އޭޑީކޭގައި ފަރުވާ ދިނުމަށްފަހު، ޖެހިގެން އައި ހުކުރު ދުވަހުއެވެ. ހުކުރު ދުވަހު ހޮޑުލާތީ އާއި ފިޓު ޖެހިގެން އަނެއްކާވެސް ހޮސްޕިޓަލަށް ގެންދެވުނެވެ. ހޮނިހިރު ދުވަހު ހޮސްޕިޓަލުން ދޫކޮށްލުމުން އަލުން ފުލުހުންގެ ހައްޔަރަށް ގެންދެވުނެވެ.

ހަމަ އެ ދުވަހު ކޯޓުން ޝަރީއަތް ނިމެންދެން ބަންދުގައި ބެހެއްޓުމަށް އަމުރުކުރިއެވެ. އަމިއްލައަށް މަރުވާން މަސައްކަތްކުރީ އޭގެ ފަހުން ފުލުހުންގެ ބެލުމުގެ ދަށުގައި، ދޫނިދޫގައި ގޮޅީގައި ބަންދުގައި ހުއްޓައެވެ.