ހަމާސްގެ ބަންދުގައި ތިބި ރަހީނުން މަރުވުމާ ގުޅިގެން އިޒްރޭލުގައި ބޮޑު މުޒާހަރާއެއް

ހަމާސްގެ ހަނގުރާމަވެރިން ރަހީނުކުރި މީހުންގެ ތެރެއިން ހަ މީހަކު މަރާލައި އެ މީހުންގެ ހަށިތައް ފެނުމާ ގުޅިގެން ހަނގުރާމަ ހުއްޓާލުމަށް ގޮވާލައި އިޒްރޭލުގެ މައި ލޭބާ ޔޫނިއަނުން ގިނަ ބަޔަކު މަގުތަކަށް ނެރެ ބޮޑު ހަޅުތާލެއް ކޮށްފިއެވެ.

ގާޒާ ހަނގުރާމަ ފެށި ފަހުން އިޒްރޭލު ސަރުކާރާ ދެކޮޅަށް ބޭއްވި އެންމެ ބޮޑު އެއް މުޒާހަރާ މިއީ ކަމަށް ބެލެވެއެވެ. މި މުޒާހަރާގައި، ރޭ މުޒާހަރާގެ ބައިވެރިންނާއި ސަލާމަތީ ބާރުތަކާ ދެމެދު ހަމަނުޖެހުންތަކެއް ހިނގާފައިވާ ކަމަށް ރިޕޯޓްތައް ބުނެއެވެ.

މުޒާހަރާގެ ބައިވެރިން ވަނީ ހަނގުރާމަ ވަގުތުން ވަގުތަށް ހުއްޓާލުމަށް ގޮވާލައިފައެވެ. އަދި އިޒްރޭލުގައި މިހާރު ރަހީނުކޮށްފައިވާ އިޒްރޭލުގެ މީހުން މިނިވަންކޮށް ވަގުތުން ގައުމަށް ގެނައުމަށް ބޮޑުވަޒީރު ބެންޖަމިން ނަތަންޔާހޫ ފަލަސްތީނުގެ ހަމާސް ޖަމާއަތާ އެކު ސުލްހައިގެ އެއްބަސްވުމަކަށް އައުމަށް ވެސް އެ މީހުން ވަނީ ގޮވާލައިފައެވެ.

ހަމާސް އިން ރަހީނުކޮށް މަރާލި މީހުންގެ އާއިލާތަކުން އެދިފައިވަނީ، އިޒްރޭލު ސަރުކާރަށް އިތުރު ޕްރެޝަރު ކުރުމަށް އިޒްރޭލުގެ ރައްޔިތުންގެ ކިބައިން އެދިފައެވެ. އާއިލާތަކުން ބުނެފައިވަނީ ރަހީނުކޮށް ހިފަހައްޓާފައިވާ މީހުން އެނބުރި ގައުމަށް ގެނެވެންދެން ރައްޔިތުން މަގުތަކަށް ނުކުމެ ގައުމު ބަންދު ކުރަން ޖެހޭ ކަމަށެވެ.

އިޒްރޭލުގެ އެންމެ ބޮޑު ޓްރޭޑް ޔޫނިއަން ފެޑެރޭޝަން، ހިސްޓަޑްރޫޓުން ވަނީ ހަނގުރާމަ ހުއްޓާލުމުގެ އެއްބަސްވުމެއްގައި ސޮއިކުރުމަށް ސަރުކާރަށް ޕްރެޝަރު ކުރުމަށް އާންމު ހަޅުތާލެއް ކުރުމަށް ގޮވާލައިފައެވެ. މީގެ ތެރޭގައި ބެން ގުރިއަން އެއާޕޯޓު ބަންދުކުރުމާއި، ބޭންކިން އަދި ސިއްހީ ހިދުމަތް މެދުކަނޑާލުން ހިމެނެއެވެ.

އިޒްރޭލުގެ މެނުފެކްޗާސް އެސޯސިއޭޝަނުން ބުނެފައިވަނީ އެ ހަޅުތާލަށް ތާއީދުކުރާ ކަމަށާއި ރަހީނުން އެނބުރި ގެނައުމަށް ސަރުކާރުން އަދާކުރަންޖެހޭ "އަހްލާގީ ވާޖިބު" އަދާނުކުރާ ކަމަށެވެ.

އިޒްރޭލުގެ އިދިކޮޅު ލީޑަރު އަދި ކުރީގެ ބޮޑުވަޒީރު ޔައިރު ލަޕިޑް ވެސް ވަނީ ހަޅުތާލަށް ތާއީދު ކުރައްވާ ކަމަށް ވިދާޅުވެފައެވެ. ނަމަވެސް ސަރުކާރުގެ ފަރާތުން ފިނޭންސް މިނިސްޓަރު ބެޒަލޭލް ސްމޮޓްރިޗް ވަނީ ހަޅުތާލު ހުއްޓުވުމަށް ކޯޓަށް ހުށަހެޅުމަށް ބަންޑާރަނައިބުގެ ކިބައިން އެދިވަޑައިގެންފައެވެ. އިޒްރޭލުގެ އަސްކަރިއްޔާއިން ބުނެފައިވަނީ ބާކީ ތިބި ރަހީނުން ސަލާމަތް ކުރެވޭނީ އެއްބަސްވުމަކުން ކަމަށެވެ.