މަސް ގަންނަ އަގު ދަށް ނުކޮށް ހިފެހެއްޓުމަށް މިފްކޯއިން މަސައްކަތްކުރަނީ

މިފްކޯއިން މަސް ގަންނަ އަގަށް ބަދަލު ނުގެންނަނީ ދުނިޔޭގެ ބާޒާރުގައި ކަނޑުމަހުގެ އަގަށް އަދިވެސް ހެޔޮ ބަދަލެއް ނާންނާތީ ކަމަށް އެ ކުންފުނިން މިއަދު ބުނެފިއެވެ.

މިދިޔަ ޖުލައި މަހުން ފެށިގެން ކޮންމެ ހަފްތާއަކު މަސް ގަންނަ އަގު ކަނޑައަޅާ ގޮތަށް ނިންމި ނަމަވެސް، މިހާތަނަށް އަގަށް ބަދަލެއް ގެނެސްފައެއް ނުވެއެވެ.

މިފްކޯއިން ބުނީ މިވަގުތު މަސައްކަތްކުރަނީ ބާޒާރުގައި މަހުގެ އަގު ރަނގަޅުވަންދެން 16 ރުފިޔާއަށް ވުރެ ދަށް ނުވާ ގޮތަށް އަގު ހިފެހެއްޓުމަށް ކަމަށެވެ. އަދި ދުނިޔޭގެ ބާޒާރުގެ އަގުތައް ބަލަން ގެންގުޅޭ މޮޑެލްތަކަށް ރިއާޔަތްކޮށް، މަހުގެ އަގަށް ހެޔޮ ބަދަލެއް ގެންނަން ލިބޭ ކޮންމެ ފުރުސަތެއްގެ ބޭނުން ހިފާނެ ކަމަށް ވެސް ބުންޏެވެ.

މި އަހަރު މިފްކޯއަށް މަސް ކިރުވި އަދަދު، މިދިޔަ އަހަރުގެ މި މުއްދަތާ އަޅާބަލާއިރު %42 އިންސައްތަ  ދަށްވެފައިވާ ކަމަށް މިފްކޯއިން ފާހަގަކޮށްފައިވެއެވެ. މިދުވަސްވަރު ރާއްޖޭގެ މަސްވެރިކަން ވަރަށް ދަށްވެފައިވާއިރު، ގަނޑުކުރި ކަނޑުމަހުގެ ޝިޕްމެންޓުތަކުގެ އަގު ވެސް ވަރަށް ބޮޑަށް ދަށްވެފައިވާ ކަމަށް ބުނެފައިވެއެވެ.

މިފްކޯއިން އިތުރަށް ބުނީ މިހާރު ވެސް މަހުގެ އަގު ވަކި މިންވަރެއްގައި ހިފެހެއްޓުމަށް ކުންފުންޏަށް ސަރުކާރުގެ ސަބްސިޑީ ބޭނުންވާ ކަމަށެވެ. ސަރުކާރުގެ ކޭޝްފްލޯއަށް ދިމާވެފައިވާ ދަތިކަމާއި، މަސްވެރިކަން ހީނަރުވުމުގެ ސަބަބުން ކުންފުނީގެ ކޭޝްފްލޯއަށް ބޮޑެތި ދަތިތަކާ ވަނީ ކުރިމަތިލާން ޖެހިފައި ކަމަށް ވެސް ބުނެފައިވެއެވެ.

މިފްކޯއިން ބުނީ ކުރިއަށް އޮތް ތަނުގައި ބައިނަލްއަގުވާމީ ބާޒާރުގައި ރޯމަހުގެ އަގު ދަށަށް ހިނގައްޖެ ނަމަ، މަސްކިލޯއެއް ގަންނަ އަގު ދަށްކުރުން ނޫން އިތުރު ގޮތެއް ނޯންނާނެ ކަމަށެވެ. އެހެންކަމުން މިފްކޯއަށާއި، ސިނާއަތަށް މި ވަގުތަށް އޮތް އެންމެ ރަނގަޅު ގޮތަކީ މަހުގެ އަގު ދަށްނުކޮށް ބައިނަލްއަގްވާމީ މާކެޓުގައި މަހުގެ އަގަށް އަންނަ ހެޔޮ ބަދަލެއް ފެންނަންދެން މަޑުކޮށްގެން ތިބުން ކަމަށް ވެސް މިފްކޯއިން ބުންޏެވެ.

މި އަހަރުގެ މި ހާލަތުގެ ސަބަބުން މަސްވެރިން މަހަށް ފުރުމަށް ހިތްވަރު ދިނުމުގެ ގޮތުން މިފްކޯއިން ވަނީ ފިޔަވަޅުތަކެއް އަޅައިފައެވެ. އެގޮތުން މިފްކޯއަށް މަސްކިރާ ދޯނިތަކަށް 10 ޓަނާ ހަމައަށް ފަހުން ފައިސާ ދައްކާ ގޮތަށް އައިސް ދޫކުރުން ހިމެނެއެވެ. މިފްކޯއިން އިތުރަށް ބުނީ މި މައްސަލައާ ގުޅޭގޮތުން ކަމާ ގުޅުން ހުރި ފަރާތްތަކާ އެކު މަޝްވަރާތައް ކުރަމުން އަންނަ ކަމަށެވެ.