ހުޅުމާލޭގައި ހިނގި ނުރައްކާތެރި އެކްސިޑެންޓާ ގުޅިގެން ކާރު ދުއްވި ފަރާތް އަލުން ބަންދުކޮށްފި

މިދިޔަ ޖުލައި މަހުގެ 31 ވަނަ ދުވަހު ހުޅުމާލޭ 2 ގައި ހިނގި ނުރައްކާތެރި އެކްސިޑެންޓާ ގުޅިގެން ހައްޔަރުކުރެވުނު ކާރު ދުއްވި ފަރާތް، އިބްރާހިމް އިކްރާމް، ކޯޓު އަމުރެއްގެ ދަށުން އަނެއްކާވެސް ބަންދު ކޮށްފިއެވެ.

މި އެކްސިޑެންޓާއި ގުޅިގެން އިކްރާމް، ޝަރީޢަތް ނިމެންދެން ބަންދުގައި ބެހެއްޓުމަށް ކްރިމިނަލް ކޯޓުން އަމުރުކޮށްފައިވަނިކޮށް، އެ އަމުރު ކުރީ އޭނާއަށް ވަކީލެއްގެ އެހީތެރިކަން ނުލިބޭ ގޮތަށް ކަމަށް ބުނެ ހައިކޯޓުން ވަނީ އެ އަމުރު ބާތިލް ކޮށްފައެވެ. އެއާއެކު އިކްރާމް މިނިވަންވެފައިވާއިރު، އެކަމާއި ގުޅިގެން ހޯމް މިނިސްޓަރު ޢަލީ އިޙްސާން ރޭ އެކްސްގައި ކުރެއްވި ޕޯސްޓެއްގައި ވަނީ އެކަން ހިނގިގޮތް ތަހުގީގުކޮށް އިހްމާލެއް ވެފައިވާ ނަމަ އެމީހަކަށް ނުވަތަ ބަޔަކަށް ހަރުކަށި ފިޔަވަޅު އެޅޭނެ ކަމަށް ވިދާޅުވެފައެވެ.

މިނިސްޓަރު ވިދާޅުވެފައިވަނީ ދޫކޮށްލި މީހާ ކޯޓު އަމުރެއްގެ ދަށުން ބަންދު ކުރުމަށް މަސައްކަތް ކުރައްވަމުންދާ ކަމަށެވެ. އަދި ފަހުން ކުރެއްވި ޕޯސްޓެއްގައި ވަނީ ކޯޓު އަމުރެއްގެ ދަށުން އޭނާ އަލުން ހައްޔަރު ކުރެވިފައިވާ ކަމަށް ވިދާޅުވެފައެވެ.

މި އެކްސިޑެންޓު ހިނގީ ވިނަރެސް ފްލެޓްތަކުގެ މެދަށް އޮންނަ މަގުން ބާރު ސްޕީޑުގައި ދުއްވި ކާރެއް ކޮންޓްރޯލުން ނެއްޓި، މަގުގެ އެއްފަރާތުގައި ސައިކަލެއްގައި މަޑުކޮށްގެން އިން މީހެއްގެ ގައިގައި ޖެހިގެންނެވެ. އެކްސިޑެންޓަށްފަހު އިކްރާމާއި ކާރުގައި ތިބި އިތުރު ދެ މީހުން ވަނީ ފިލާފައެވެ. ނަމަވެސް އިކްރާމް އެރޭ ހައްޔަރުކުރެވުނެވެ. އަދި ކާރުގައި އިން އަނެއް މީހާ، އިކްރާމުއްރަޙްމާނާއި ޖިނާޙް އިސްމާޢީލް ވެސް ވަނީ ފަހުން ހައްޔަރުކޮށްފައެވެ.

އާއްމުވެފައިވާ ފޮޓޯތަކަށް ބަލާއި އެކްސިޑެންޓްވި ކާރަކީ މާލެ ޒޯންގައި ދުއްވަން ރަޖިސްޓްރީކޮށްފައިވާ އުޅަނދެއް ވެސް ނޫނެވެ.